लण्डन। मध्यपूर्वमा शान्ति सम्झौताको सम्भावना बढेसँगै विश्व बजारमा तेलको मूल्य घटेको छ भने अधिकांश देशका शेयर बजारमा सुधार देखिएको छ ।
कृत्रिम बुद्धिमत्ता सम्बन्धी कम्पनीहरूमा पुनः लगानीकर्ताको आकर्षण बढ्दा शेयर बजारले सकारात्मक गति लिएको हो ।
दक्षिण कोरियाको प्रमुख शेयर सूचकांक सोमबारको ठूलो गिरावटपछि मंगलबार उल्लेखनीय रूपमा बढ्यो । अमेरिकी ब्याजदर बढ्न सक्ने सम्भावना र प्रविधि कम्पनीहरूको अत्यधिक मूल्यांकनको चिन्ताका कारण अघिल्लो दिन बजार घटेको थियो ।
युरोपका प्रमुख शेयर बजारहरू पनि बढेका छन् । जर्मनी र फ्रान्सका बजारमा वृद्धि देखियो । जर्मनीको औद्योगिक उत्पादन र निर्यात अप्रिल महिनामा केही बढेको सरकारी तथ्यांकले लगानीकर्ताको विश्वास बढाएको छ । यद्यपि बेलायतको शेयर बजार भने एक प्रमुख औषधि कम्पनीले अमेरिकी क्यान्सर अनुसन्धान कम्पनीलाई ठूलो रकममा खरिद गर्ने घोषणा गरेपछि केही दबाबमा परेको थियो ।
अमेरिकी राष्ट्रपति डोनाल्ड ट्रम्पले मध्यपूर्व युद्ध अन्त्य गर्ने शान्ति सम्झौतासम्बन्धी वार्ता अन्तिम चरणमा पुगेको बताउनुभयो । इरान र इजरायलबीचका आक्रमण रोकिएपछि क्षेत्रीय तनाव केही कम भएको छ ।
यसैबीच, चीनले मे महिनामा आफ्नो निर्यात बढेको जनाएको छ । प्रविधि सामग्री र मेसिनरीको उच्च निर्यातले मध्यपूर्वी द्वन्द्वका कारण परेको दबाबलाई केही हदसम्म कम गरेको बताइएको छ ।
एक लगानी रणनीतिकारका अनुसार अमेरिकी बजारमा आंशिक सुधार देखिए पनि लगानीकर्ताहरू अझै सतर्क छन् । कृत्रिम बुद्धिमत्ता क्षेत्रका कम्पनीहरूको मूल्यांकन र ब्याजदरको भविष्यबारे अनिश्चितता कायम रहेकाले बजारमा पूर्ण आत्मविश्वास फर्किन बाँकी रहेको बताइएको छ ।
विश्व बजारमा हालको अवस्था “सावधानीपूर्ण स्थिरता” का रूपमा देखिएको छ, जहाँ लगानीकर्ताहरू शान्ति प्रक्रिया, ब्याजदर र प्रविधि क्षेत्रको भविष्यतर्फ केन्द्रित छन् । (रासस/एएफपी)
