काठमाडौँ। दक्षिणी गाजाको खान युनिसस्थित अल–मवासी क्षेत्रमा रहेको हमास प्रहरी चौकीलाई लक्षित गरी इजरायलले गरेको हवाई आक्रमणमा पाँच जना प्यालेस्टिनीको मृत्यु भएको छ भने १० भन्दा बढी व्यक्ति घाइते भएका छन् ।
हमासद्वारा सञ्चालित प्रहरी महानिर्देशनालयकाअनुसार इजरायली युद्धक विमानले उक्त प्रहरी चौकीमा दुईवटा मिसाइल प्रहार गरेको थियो, जसका कारण मानवीय क्षति भएको हो ।
प्यालेस्टिनी रेड क्रिसेन्ट सोसाइटीले जारी गरेको विज्ञप्तिअनुसार घटनास्थलबाट पाँच जनाको शव तथा १० भन्दा बढी घाइतेलाई अल–मवासीस्थित फिल्ड अस्पतालमा लगिएको छ ।
प्रत्यक्षदर्शीहरूका अनुसार मृतकमध्ये प्रहरी कर्मचारी तथा सर्वसाधारण नागरिक दुवै रहेका छन् । स्थानीय बासिन्दा अबु इब्राहिमले आफूहरू पटक–पटक विस्थापित हुन बाध्य भएको भन्दै गुनासो गरे ।
यसैबीच, प्यालेस्टिनी राष्ट्रपतिले इजरायलको बढ्दो सैन्य गतिविधि तथा बसोवास विस्तार गर्नेहरूको हिंसात्मक गतिविधिले मध्यपूर्वलाई विपत्तिको संघारमा पु¥याएको जनाएको छ ।
प्यालेस्टिनी सरकारी समाचार संस्थाकाअनुसार राष्ट्रपतिको कार्यालयका प्रवक्ता नबिल अबु रुदैनेहले क्षेत्रीय शान्ति र स्थिरतामाथि गम्भीर असर पर्ने चेतावनी दिएका छन् ।
उनले प्यालेस्टिनी जनताको अधिकारलाई बेवास्ता गरेर स्थायी शान्ति सम्भव नभएको बताए । गाजास्थित स्वास्थ्य अधिकारीहरूका अनुसार अक्टोबर २०२५ मा युद्धविराम लागू भएयता इजरायली आक्रमणबाट ९५१ जना प्यालेस्टिनीको मृत्यु भइसकेको छ ।
सन् २०२३ अक्टोबर ७ देखि हालसम्म गाजामा मृत्यु हुनेको संख्या ७२ हजार ९६१ पुगेको बताइएको छ । सिन्ह्वा/न्युज एजेन्सी नेपाल
