काठमाडौँ। श्रम संस्कृति पार्टीका अध्यक्ष एवं प्रतिनिधिसभा सदस्य हर्कराज राई (हर्क साम्पाङ) ट्राफिक प्रहरी कारबाहीमा परेका छन् ।
सामाजिक सञ्जालमा ट्राफिक नियम उल्लंघन गरी सवारी साधन चलाएको भिडियो सार्वजनिक भएपछि प्रहरीले उनलाई लापरबाहीपूर्वक सवारी चलाएको कसुरमा कारबाहीको दायरामा ल्याएको हो।
साम्पाङ एक हातले मोटरसाइकलको ह्यान्डल र अर्को हातले मोबाइल फोन समातेर भिडियो गर्ने क्रममा दुर्घटनामा परेका थिए। ट्राफिक नियम पालना नगरी सवारी चलाएको जनगुनासोका आधारमा सम्पाङलाई कारबाही गरिएको प्रहरीले जनाएको छ।
साम्पाङले सवारी चलाउँदा न्यूनतम सुरक्षा मापदण्ड र ट्राफिक नियम पालना नगरेको दृश्यसहितको भिडियो आफैँले पोस्ट गरेका थिए।
उनी त्यो दिन दुर्घटनामा समेत परेका थिए । दुर्घटनामा हातमा सामान्य चोट लागेको सांसद राईले नै सामाजिक सञ्जालमा राखेको भिडियो देखिएको थियो ।
साम्पाङको उक्त भिडियो सार्वजनिक भएसँगै धेरैले सामाजिक सञ्जालमार्फत् कारबाहीको माग गरेका थिए ।
