काठमाडौँ। एमएस ग्रुप अन्तर्गतको कम्पनी क्यापिटल होटल एन्ड हस्पिटालिटी लिमिटेडले आज म्यारियट इन्टरनेसनलसँग होटल व्यवस्थापन सम्झौता (होटल म्यानेजमेन्ट एग्रिमेन्ट) सम्पन्न गरेको घोषणा गरेको छ।
यस सम्झौता अनुसार नेपालमा पहिलो पटक जेडब्ल्यू म्यारियट होटल काठमाडौं भ्याली सञ्चालनमा आउनेछ। यो सम्झौता दुई कम्पनीबीचको चौथो सहकार्यका साथै नेपालको लक्जरी हस्पिटालिटी क्षेत्रका लागि एक महत्वपूर्ण उपलब्धि पनि हो।
सन् २०३१ को प्रारम्भमा सञ्चालनमा ल्याउने लक्ष्यसहित निर्माण हुने जेडब्ल्यू म्यारियट होटल काठमाडौं भ्यालीमा २२१ वटा विलासी अतिथि कक्ष रहनेछन्।
त्रिभुवन अन्तर्राष्ट्रिय विमानस्थलबाट करिब १५ मिनेटको दूरीमा रहने यस होटलबाट काठमाडौंका युनेस्को विश्व सम्पदा सूचीमा सूचीकृत स्थलहरू तथा अन्य सांस्कृतिक सम्पदा स्थलहरूमा सहज पहुँच हुनेछ। होटलमा विभिन्न भोजनालय, स्पा, फिटनेस सेन्टर, स्विमिङ पुल, जेडब्ल्यू गार्डेन तथा १,६०० वर्ग मिटरभन्दा बढी क्षेत्रफलको कार्यक्रम तथा सभा स्थल रहनेछन्।
होटल व्यवस्थापन सम्झौतामा क्यापिटल होटल एन्ड हस्पिटालिटी लिमिटेडका संचालक तथा प्रबन्ध निर्देशक गौरव अग्रवाल र म्यारियट एशिया-प्यासिफिक (चीन बाहेक) का अध्यक्ष राज मेननले हस्ताक्षर गरेका थिए।
साथै, क्यापिटल होटलको तर्फबाट शशीकान्त अग्रवाल र म्यारियट इन्टरनेसनलको तर्फबाट डेभिड म्यारियटबीच थप सम्झौता आदानप्रदान गरिएको थियो। कार्यक्रममा प्रतिनिधिसभा सदस्य माननीय मिङ्मा डेभिड शेर्पाको पनि विशेष उपस्थिति रहेको थियो र उहाँले सम्झौता समारोहको साक्षी बस्नुभयो।
“म्यारियटसँग पुनः सहकार्य गर्न पाउनु हाम्रो लागि अत्यन्तै महत्वपूर्ण अवसर हो। यस साझेदारी मार्फत हामी नेपालको पर्यटन विकासमा उल्लेखनीय योगदान पुर्याउने एक प्रतिष्ठित लक्जरी होटल स्थापना गर्नेछौं,” गौरव अग्रवालले भन्नुभयो, “हाम्रो उद्देश्य नेपालका प्राकृतिक, सांस्कृतिक र आतिथ्यको विशेषता झल्काउने अविस्मरणीय अनुभव प्रदान गर्नुका साथै अन्तर्राष्ट्रिय स्तरका उत्कृष्ट हस्पिटालिटी मापदण्ड कायम गर्नु हो।”
जेडब्ल्यू म्यारियट होटल काठमाडौं भ्याली, दक्षिण एशियामा म्यारियट इन्टरनेसनलको विस्तार हुँदै गएको होटल पोर्टफोलियोमा थपिने नयाँ होटल हुनेछ। यसले नेपालको राजधानीमा विश्वव्यापी रूपमा परिचित जेडब्ल्यू म्यारियटको परिष्कृत विलासिता र उत्कृष्ट आतिथ्य अनुभव ल्याउनेछ।
