काठमाडाैँ । भारतको राजधानी नयाँ दिल्लीस्थित जन्तरमन्तरमा आज ‘ककरोच जनता पार्टी (सीजेपी)’ ले विरोध प्रदर्शन गरेको छ। पार्टीका संस्थापक अभिजित दीपक आजै अमेरिकाबाट भारत आइपुगेपछि प्रत्यक्ष रूपमा प्रदर्शनस्थल पुगेका हुन्।
सयौँको संख्यामा सहभागी प्रदर्शनकारीहरूले शिक्षामन्त्रीको कार्यशैलीविरुद्ध चर्को नाराबाजी गर्दै प्रदर्शन गरेका थिए। प्रदर्शनका क्रममा उनीहरूले परीक्षा प्रणालीमा भएका कथित अनियमितताप्रति असन्तोष व्यक्त गरेका छन्।
ककरोच जनता पार्टीले आफ्नो प्रदर्शन निट-यूजी पेपर लिक, साथै सीबीएसई, सीयूईटी र एसएससी-जीडीजस्ता विभिन्न परीक्षामा देखिएका अनियमितता र भ्रष्टाचारविरुद्ध केन्द्रित रहेको जनाएको छ।
प्रदर्शनकारीहरूले वर्तमान शिक्षामन्त्रीको कार्यकालमा युवाहरूको भविष्य संकटमा परेको आरोप लगाउँदै तत्काल सुधारको माग गरेका छन्।
सामाजिक सञ्जालमा व्यंग्यात्मक अभियानबाट सुरु भएको भनिएको ककरोच जनता पार्टी हाल जन्तरमन्तरमा भएको यस प्रदर्शनसँगै सार्वजनिक रूपमा चर्चामा आएको छ।
