काठमाडौं । प्रतिनिधिसभा बैठकमा भएको अव्यवस्था, नाराबाजी तथा धक्कामुक्की लगायतका घटनाबारे छानबिन गर्न समिति गठन गरिएको छ । सभामुखले संसद् नियमावलीअनुसार ७ दिनभित्र प्रतिवेदन बुझाउने गरी समिति बनाइएको जानकारी दिएका हुन् ।
सभामुखका अनुसार प्रतिनिधिसभा नियमावली, २०८३ को नियम ३३ को उपनियम ४ बमोजिम बैठकपछि भएका गतिविधिबारे विस्तृत अध्ययन गरी प्रतिवेदन तयार पार्न समिति गठन गरिएको हो । समितिलाई घटनाको सम्पूर्ण तथ्य संकलन गर्दै सभामुखसमक्ष प्रतिवेदन पेस गर्ने जिम्मेवारी दिइएको छ ।
गठन गरिएको समितिको संयोजक प्रतिनिधिसभाका सचिव प्रकाश अधिकारी रहेका छन् । समितिमा संघीय संसद् सचिवालयका आन्तरिक सेवा तथा योजना व्यवस्थापन महाशाखा प्रमुख तथा प्रविधि व्यवस्थापन महाशाखा प्रमुख सदस्यका रूपमा रहेका छन् ।
सभामुखले सोमबार संसद् सचिवालयका कर्मचारीहरूसँग यस विषयमा परामर्शसमेत गरेका थिए । आइतबारको प्रतिनिधिसभा बैठकमा विपक्षी दलका सांसदहरूले वेल घेराउ गर्दै नाराबाजी गरेपछि बैठक अवरुद्ध भएको थियो । त्यस क्रममा सांसदहरूबीच धक्कामुक्की र घम्साघम्सीसमेत भएको थियो ।
त्यो दिन प्रतिनिधिसभामा नियमावली पारित गर्ने प्रक्रिया अघि बढाइएको थियो । विपक्षी दलहरूले संशोधन प्रस्तावहरूलाई संसदीय समितिमा पठाएर छलफल गर्नुपर्ने माग राखे पनि सभामुखले दफावार छलफल पूरा भइसकेको भन्दै प्रक्रियाअनुसार निर्णय अघि बढाएका थिए । त्यसपछि विरोधका बीच प्रस्तावलाई निर्णय प्रक्रियामा लगिएको थियो ।
यसैबीच, घटनाको छानबिन प्रतिवेदन प्राप्त भएपछि नियमावलीअनुसार आवश्यक कारबाही प्रक्रिया अघि बढाइने सभामुखले बताएका छन् ।
