काठमाडौँ । प्रधानमन्त्री बालेन्द्र शाहको अभिव्यक्तिलाई लिएर विपक्षी दलहरूले आपत्ति जनाएपछि प्रतिनिधिसभा बैठक अवरुद्ध भएको छ।
सोमबार बसेको प्रतिनिधिसभा बैठकमा विपक्षी दलका सांसदहरूले प्रधानमन्त्रीले दिएको अभिव्यक्ति संसद्को अभिलेख (रेकर्ड) बाट हटाउन माग गरेका थिए। उक्त अभिव्यक्ति हटाइएन भने सदनको कारबाही अघि बढ्न नदिने अडान विपक्षी सांसदहरूले राखेका थिए।
विपक्षी दलका तर्फबाट धारणा राखेपछि सांसदहरू आ–आफ्नो स्थानबाट उठेर विरोध जनाएका थिए। सभामुखले पटक–पटक सांसदहरूलाई आफ्नो स्थानमा बस्न र बैठक सञ्चालनमा सहयोग गर्न आग्रह गरे पनि उनीहरू नमानेपछि सदनको अवरोध कायमै रहेको थियो।
सदनको अवरोध हट्ने अवस्था नदेखिएपछि सभामुखले प्रतिनिधिसभा बैठक १५ मिनेटका लागि स्थगित भएको घोषणा गरेका थिए। प्रधानमन्त्रीको अभिव्यक्तिलाई लिएर सत्ता र विपक्षी दलबीच विवाद चर्किएपछि संसद्को नियमित कार्यसूची प्रभावित भएको छ।
