काठमाडाैँ । जल तथा मौसम विज्ञान विभागले आज (शुक्रबार) राति देशभरका तराई र पहाडी क्षेत्रमा तीव्र वेगको हावाहुरी चल्ने सम्भावना रहेको भन्दै चेतावनी जारी गरेको छ।
विभागका अनुसार हुरीसँगै केही स्थानमा असिनापानी पर्ने सम्भावनासमेत देखिएको छ। सम्भावित जोखिमका आधारमा विभागले विभिन्न क्षेत्रलाई फरक–फरक रङमा वर्गीकरण गर्दै चेतावनी नक्सा सार्वजनिक गरेको छ।
विभागले जारी गरेको सूचनामा भनिएको छ, “आज राति देशका तराई र पहाडी क्षेत्रमा तीव्र गतिको हावाहुरी चल्ने सम्भावना छ। हावाहुरीसँगै कतिपय स्थानमा असिनापानी पनि पर्न सक्छ।”
नक्सामा सुन्तला रङले चिन्हित तराई क्षेत्रका बासिन्दालाई विशेष सतर्क रहन आग्रह गरिएको छ भने पहेँलो रङले देखाइएका पहाडी क्षेत्रका बासिन्दालाई मौसमसम्बन्धी जानकारी नियमित रूपमा लिँदै आवश्यक सावधानी अपनाउन विभागले अनुरोध गरेको छ।
