काठमाडौं । राष्ट्रिय स्वतन्त्र पार्टी (रास्वपा) का सभापति रबि लामिछानेको आसन्न भारत भ्रमणलाई लिएर श्रम संस्कृति पार्टीका अध्यक्ष हर्कराज राईले सामाजिक सञ्जालमार्फत टिप्पणी गरेका छन्।
अध्यक्ष राईले सामाजिक सञ्जालमा लेख्दै लामिछानेलाई भारतसँग लिपुलेक–लिम्पियाधुरा क्षेत्रको विषय उठाउन आग्रह गरेका हुन्। उनले लेखेका छन्, “रबी लामिछाने जी, अब भारत गएर लिपुलेक–लिम्पियाधुरा फर्काउन भारतसँग बोल्नु है! पहिले पत्रकार हुँदा त निकै डुक्रिनु भएको थियो!”
भारतीय जनता पार्टी (भाजपा) को निमन्त्रणामा राष्ट्रिय स्वतन्त्र पार्टीका सभापति लामिछाने आगामी जेठ १८ गतेदेखि भारत भ्रमणमा जान लागेका छन्। उनी जेठ २० गते स्वदेश फर्कने कार्यक्रम तय भएको बताइएको छ।
स्रोतका अनुसार भारत भ्रमणका क्रममा लामिछानेले भारतका प्रधानमन्त्री नरेन्द्र मोदी, विदेशमन्त्री एस जयशंकर तथा भारतीय जनता पार्टी (भाजपा) का राष्ट्रिय अध्यक्ष नितिन नवीन लगायतसँग भेट गर्ने तयारी भइरहेको छ।
लिपुलेक–लिम्पियाधुरा क्षेत्र लामो समयदेखि नेपाल–भारतबीच संवेदनशील सीमा विवादको विषय रहँदै आएको छ। यस्तो अवस्थामा लामिछानेको भारत भ्रमण र त्यसअघि आएको राजनीतिक टिप्पणीले थप चासो सिर्जना गरेको छ।
