काठमाडौं । नेपाली काँग्रेसका सभापति गगनकुमार थापाले संयुक्त राष्ट्रसंघको महासभामा नेपालको हितसँग जोडिएका विषयलाई प्रभावकारी रूपमा उठाउन सरकारलाई आग्रह गर्नुभएको छ।
शुक्रबार पार्टी केन्द्रीय कार्यालय सानेपामा आयोजित ‘द ग्रीन टेबल’को १८औँ श्रृङ्खला अन्तर्गत ‘हिमचुलीको हलचलः भोटेकोशीको चेतावनी र विश्वको साझा जिम्मेवारी’ विषयक संवाद कार्यक्रममा बोल्दै सभापति थापाले प्रधानमन्त्री बालेन्द्र साहलाई महासभामा सहभागी भएको पहिलो अवसर भएकै कारण आत्तिनुपर्ने अवस्था नरहेको बताउनुभयो।
उहाँले विगतका सरकारको विरासत बोकेर तथा आगामी सरकारको अगुवाका रूपमा महासभामा नेपालको धारणा निर्धक्कसँग राख्न प्रधानमन्त्री साहलाई सुझाव दिनुभयो। महासभामा प्रधानमन्त्रीले कुनै दल विशेषको मात्र नभई सिंगो देश र सबै नेपालीको भावनाको प्रतिनिधित्व गर्नुपर्ने उहाँको भनाइ थियो।
जलवायु परिवर्तनका विषयमा नेपालभित्रै लामो समयदेखि अध्ययन तथा अनुसन्धान गरिरहेका विज्ञ र अध्येताहरूको सुझाव लिएर महासभामा प्रमाणसहित नेपालको धारणा प्रस्तुत गर्नुपर्नेमा थापाले जोड दिनुभयो।
“तपाईं हामी सबै नेपालीको भावनालाई प्रतिनिधित्व गरेर संयुक्त राष्ट्रसंघको महासभामा जाँदै हुनुहुन्छ। योभन्दा अगाडिका सरकारको पनि विरासत बोकेर जाँदै हुनुहुन्छ र योभन्दा पछाडि आउने सरकारको पनि अगुवा बनेर जाँदै हुनुहुन्छ,” थापाले भन्नुभयो।
नेपालले महासभामा आफ्ना लागि के विषयमा आवाज उठाउने र के विषयमा लड्ने भन्ने कुरा स्पष्ट रूपमा राख्नुपर्ने उहाँको भनाइ थियो। विपद्को प्रभाव परेका क्षेत्रमा तत्काल बस्ती पुनःस्थापना गर्ने वा नगर्ने, विपद् व्यवस्थापन तथा सम्बन्धित संस्थाहरूलाई कसरी बलियो बनाउनेलगायतका विषयमा स्पष्ट नीति आवश्यक रहेको उहाँले बताउनुभयो।
थापाले जलवायु परिवर्तनको मुद्दालाई नेपालको प्राथमिकतामा राख्नुपर्ने उल्लेख गर्दै यस विषयलाई अनुमानका आधारमा नभई तथ्य र प्रमाणका आधारमा अन्तर्राष्ट्रिय मञ्चमा प्रस्तुत गर्न सरकारलाई सुझाव दिनुभयो।
“यस क्षेत्रमा धेरै नेपाली साथीहरूले अध्ययन गर्नुभएको छ, काम गर्नुभएको छ। उहाँहरू नेपालभित्रै अध्येता तथा अध्यापनमा हुनुहुन्छ। उहाँहरूको ज्ञान र अनुभवलाई नेपालको स्रोतका रूपमा उपयोग गर्नुपर्छ,” उहाँले भन्नुभयो।
नेपालले हरेक क्षेत्रमा जलवायु परिवर्तनका असरलाई प्रमुख प्राथमिकतामा राख्दै अन्तर्राष्ट्रिय समुदायसमक्ष आफ्ना समस्या, आवश्यकता र दाबीहरू प्रमाणसहित प्रस्तुत गर्नुपर्नेमा सभापति थापाले जोड दिनुभयो।
