काठमाडौं । सत्तारुढ दल राष्ट्रिय स्वतन्त्र पार्टी (रास्वपा) की सांसद लिमा अधिकारीले रसुवाको भोटेकोशी बाढीबाट क्षतिग्रस्त सडक तथा पुलहरूको पुनर्निर्माणका लागि अधिकारसम्पन्न ‘फास्ट ट्र्याक’ संयन्त्र गठन गर्न सरकारसँग माग गर्नुभएको छ ।
शुक्रवार सिंहदरबारमा बसेको अर्थ समितिको बैठकमा बोल्दै सांसद अधिकारीले भोटेकोशी–त्रिशूली करिडोरमा आएको बाढीका कारण सडक तथा पुलहरू क्षतिग्रस्त हुँदा प्रभावित जिल्लाहरूको आन्तरिक तथा बाह्य सम्पर्क विच्छेद भएको बताउनुभयो ।
विपद्पछिको पुनर्निर्माणमा विद्यमान प्रशासनिक तथा कानुनी प्रक्रियाका कारण लामो समय लाग्ने गरेको उल्लेख गर्दै उहाँले पुनर्निर्माणका कामलाई तीव्रता दिन अधिकारसम्पन्न संयन्त्र आवश्यक रहेको बताउनुभयो । यस्तो संयन्त्र प्रधानमन्त्रीको कार्यालय वा कानून मन्त्रालयअन्तर्गत रहने गरी गठन गर्न सकिने उहाँको सुझाव छ ।
“रसुवाको भोटेकोशी बाढीबाट प्रभावित जिल्लाका सडक तथा पुलहरूको पुनर्निर्माणको काम फास्ट ट्र्याकमा गर्न सरकारलाई समितिले निर्देशन दिनुपर्छ । अहिले प्रभावित जिल्लाहरूमा आन्तरिक तथा बाह्य सम्पर्क नै टुटेको अवस्था छ,” उहाँले भन्नुभयो ।
उहाँले पुनर्निर्माणका क्रममा प्रशासनिक तथा कानुनी प्रक्रियाका कारण हुने ढिलाइ अन्त्य गर्न नीतिगत र प्रशासनिक सहजीकरण आवश्यक रहेको बताउनुभयो । “अधिकारसम्पन्न फास्ट ट्र्याक संयन्त्र बनाएर पुनर्निर्माणका कार्यहरू गर्नुपर्छ । यसो गर्न सकियो भने नीतिगत किसिमले पनि काम गर्न सहजीकरण हुन्छ,” उहाँले भन्नुभयो ।
सांसद अधिकारीले पुनर्निर्माणका क्रममा कानुनी प्रक्रियाका कारण सामान्य कामसमेत लामो समय लाग्ने गरेको उल्लेख गर्दै विपद्बाट क्षतिग्रस्त संरचनाको पुनर्निर्माणलाई विशेष प्राथमिकतामा राख्नुपर्नेमा जोड दिनुभयो ।
यस्तै, उहाँले बाढी प्रभावित नागरिकको सुरक्षित आवास तथा अन्य आधारभूत आवश्यकता पूरा गर्ने विषयमा सरकार गम्भीर हुनुपर्ने बताउनुभयो ।
सांसद अधिकारीले बाढी प्रभावित क्षेत्रका व्यवसायीहरूले लिएका कर्जाको संरचनामा समेत पुनरावलोकन गर्न सरकारसँग माग गर्नुभएको छ ।
