काठमाडौँ । नेकपा माओवादी केन्द्रका अध्यक्ष पुष्पकमल दाहाल प्रचण्डले साथीहरुका कारण आफू अध्यक्ष पदमा बसेको बताउनुभएको छ । न्युज एजेन्सी नेपालसँगको अन्तर्वार्तामा उहाँले राष्ट्रको सर्वोत्तम हितका निम्ति जनताको विकास, समृद्धि र मुक्तिको निम्ति आफूले अन्तिम समयसम्म लड्छु भनेकाले मात्र साथीहरुले आफूलाई अध्यक्षमा बस्नुपर्छ भनेको बताउनुभयो ।
“व्यत्तिगत रुपले भन्नुहुन्छ भने मलाई यत्रो बस्नुभन्दा अब रिटायर भएर संस्मरण लेख्न पो राम्रो छ । तर मैले अहिले जुन दस्ताबेज बनाउँदै छु, मलाई विश्वास छ राष्ट्रिय सम्मेलनले त्यसमा गर्व गर्नेछ, नेतृत्वप्रति गर्व गर्नेछ । यो त साइन्स हो, यो त विज्ञान हो । यो व्यक्तिगत कुर होइन भनेर म भन्न चाहन्छु”, उहाँले भन्नुभयो ।
इतिहास र घटनाक्रमले गम्भीर ढङ्गले एउटा नेतृत्वको विकास गरेको छ भन्दै उहाँले भन्नुभयो, “त्यो मेरो व्यक्तिगत कुरा होइन । त्यो आन्दोलनले लाखौँ, करोडौँ जनताको आवश्यक्ता र चाहनाले नेतृत्व विकास हुने कुरा हो ।” पार्टीलाई पनि बुर्जुवा पार्टी बनाउन चाहनेहरुले कति अध्यक्ष पदमा बसेको भनेको उहाँको भनाइ थियो ।
