काठमाडौँ। चीन र अमेरिकाबीच कृत्रिम बुद्धिमत्ता (एआई) सम्बन्धी विषयमा सरकारी स्तरमा संवाद गर्ने सहमति भएको छ ।
चिनियाँ सरकारी समाचार संस्थाका अनुसार अमेरिकी राष्ट्रपति डोनाल्ड ट्रम्पको हालैको चीन भ्रमणका क्रममा दुवै देशका शीर्ष नेतृत्वबीच कृत्रिम बुद्धिमत्ताको विकास, उपयोग तथा यसको उचित व्यवस्थापनबारे सौहार्दपूर्ण र रचनात्मक छलफल भएको थियो । उक्त छलफलले भविष्यमा दुई देशबीच यस महत्वपूर्ण प्रविधि क्षेत्रमा सहकार्यलाई अझ सुदृढ बनाउन सक्ने सङ्केत दिएको छ ।
चिनियाँ विदेश मन्त्रालयका प्रवक्ताले नियमित पत्रकार सम्मेलनमा जानकारी दिँदै चीन र अमेरिका विश्वका अग्रणी कृत्रिम बुद्धिमत्ता शक्तिहरू भएकाले यस प्रविधिको जिम्मेवार विकास र व्यवस्थापनमा सहकार्य अत्यन्त आवश्यक रहेको बताउनुभएको छ ।
उहाँका अनुसार कृत्रिम बुद्धिमत्ता केवल प्रविधिगत प्रगतिको विषय मात्र नभई मानव सभ्यताको समग्र उन्नति, विश्वव्यापी शासन प्रणाली र अन्तर्राष्ट्रिय समुदायको साझा हितसँग सम्बन्धित महत्वपूर्ण क्षेत्र हो ।
उहाँले दुवै देशले मिलेर कृत्रिम बुद्धिमत्ताको सुरक्षित, पारदर्शी र लाभदायक प्रयोग सुनिश्चित गर्नुपर्नेमा जोड दिनुभयो । साथै, यस्तो संवादले अन्तर्राष्ट्रिय स्तरमा कृत्रिम बुद्धिमत्ता सम्बन्धी साझा समझदारी र मान्यता विकास गर्न मद्दत पुग्ने अपेक्षा गरिएको छ ।
यस पहललाई कृत्रिम बुद्धिमत्ताको जिम्मेवार विकासतर्फको महत्वपूर्ण र सकारात्मक कदमका रूपमा हेरिएको छ, जसले यसको सम्भावित जोखिम न्यूनीकरण गर्दै मानव हितमा यसको अधिकतम उपयोग सुनिश्चित गर्न योगदान पुर्याउने विश्वास व्यक्त गरिएको छ । (रासस/सिन्ह्वा)
