काठमाडौं । नेपाली कांग्रेसका पूर्व कार्यवहाक सभापति पूर्णबहादुर खड्काले गगनकुमार थापा सिंगो कांग्रेसको सभापति बन्न नसकेको बताएका छन् ।
उनले आफूसँग भेट गर्न आएका बेला सिंगो पार्टीको सभापति बन्न आग्रह गरेको उल्लेख गर्दै अहिले पनि पार्टी सभापति थापा सानेपाको मात्रै सभापति रहेको बताए ।
नेपाली कांग्रेस कर्णाली प्रदेश कार्यसमितिको आयोजनामा ‘नेपाली कांग्रेस बृहत्तर एकता र भावी कार्यदिशा’ विषयक विचार गोष्ठीमा बोल्दै पूर्व कार्यबहाक सभापति खड्काले पार्टी विभाजनको डिलमा रहेको बताए ।
उनले तत्कालीन समयमा गिरिजाप्रसाद कोइरालाका कारणले पार्टी फुटेको र उनकै कारणले पार्टी एकीकरण भएको बताउँदै अहिले पनि पार्टी फुटाउने वा जुटाउने सम्पूर्ण हात सभापति थापासँग रहेको बताए ।
‘पार्टी विभाजनको डिलमा छ, म त्यो बाटोमा जान हुन्न भन्छु,’ सभापति र उपसभापतिसँगको केही दिनअघि भएको भेटमा खड्काले भने, ‘तर, पार्टी मिलाउने कि फुटाउने तपाईहरुको जिम्मामा छ भनेको छु ।’ उनले अदालतले जिताएपछि आफूहरुले पनि सभापति मानेको बताउँदै सिंगो कांग्रेसको सभापति बन्न सुझाव दिए ।
पूर्व कार्यवहाक सभापति खड्काले विशेष महाधिवेशनका कारणले कांग्रेस प्रििनधिसभाको निर्वाचनमा खुम्चिएको बताए । ‘विशेष महाधिवेशनको कारणले कांग्रेस ३८ सिटमा खुम्चियो, रास्वपा दुई तिहाई नजिक पुग्यो, उनले भने, ‘त्यो नभएको भए देशको परिस्थिति अर्कै हुन्थ्यो ।’
