काठमाडौं । खाद्य प्रविधि तथा गुण नियन्त्रण विभागले नोभा ब्रान्डको आइसक्रिमको एक ब्याच मानव उपभोगका लागि उपयुक्त नदेखिएको भन्दै बजारबाट तत्काल फिर्ता (रिकल) गर्न आदेश जारी गरेको छ।
विभागले बजार अनुगमन तथा निरीक्षणका क्रममा संकलन गरिएको नमुना प्रयोगशालामा परीक्षण गर्दा आइसक्रिममा कुल ब्याक्टेरिया संख्या, कोलिफर्म तथा इन्टेरोब्याक्टेरियास जस्ता हानिकारक ब्याक्टेरियाको उपस्थिति पाइएको जनाएको छ।
विभागका अनुसार उक्त ब्याक्टेरियाको उपस्थितिका कारण उत्पादन मानव उपभोगका लागि उपयुक्त नदेखिएको निष्कर्ष निकालिएको हो। खाद्य स्वच्छता तथा गुणस्तर ऐन, २०८१ को दफा ३८(२) बमोजिम सम्बन्धित ब्याच नम्बरका सबै उत्पादन बजारबाट तुरुन्त फिर्ता गर्न निर्देशन दिइएको छ।
त्यसैगरी सोही दफाको उपदफा (४) अनुसार उक्त उत्पादनको बिक्री–वितरण नगर्न र नगराउन समेत सम्बन्धित उत्पादकलाई आदेश दिइएको विभागले स्पष्ट पारेको छ।
विभागले जारी गरेको आदेश अनुसार नोभा ब्रान्डको १००० मिलिलिटर क्षमताको आइसक्रिम (ब्याच नम्बर C02) मानव स्वास्थ्यका दृष्टिले असुरक्षित देखिएको हो। उक्त उत्पादन फिसटेल डेरी प्रा. लि., पोखरा औद्योगिक क्षेत्र, पोखराले उत्पादन गरेको उल्लेख गरिएको छ। उत्पादन मिति २०८२ साउन १९ रहेको र उपभोग्य अवधि १२ महिना रहेको पनि सूचनामा जनाइएको छ।
विभागले सम्बन्धित सबै निकायलाई उक्त ब्याचका उत्पादन तत्काल बजारबाट हटाउन र उपभोक्ता सुरक्षामा कुनै सम्झौता नगर्न आग्रह गरेको छ।
