काठमाडौं । खाद्य प्रविधि तथा गुण नियन्त्रण विभागले गुणस्तर मापदण्ड विपरीत उत्पादन भएको भन्दै एक ब्रान्डको बिस्कुट बजारबाट तत्काल फिर्ता गर्न निर्देशन दिएको छ ।
विभागले बजार अनुगमन तथा निरीक्षणका क्रममा संकलन गरिएको नमुना परीक्षण गर्दा ‘ज्याक न्याक क्र्याकर्स’ नामक बिस्कुटमा नेपाल सरकारले तोकेको अनिवार्य गुणस्तर मापदण्ड अनुरूप एक्सट्राक्टेड फ्याटको एसिड भ्यालु नपाइएको जनाएको हो ।
विभागका अनुसार खाद्य स्वच्छता तथा गुणस्तर ऐन, २०८१ को दफा ३८(२) बमोजिम उक्त उत्पादनको सम्बन्धित ब्याच बजारबाट तत्काल ‘रिकल’ गर्न आदेश जारी गरिएको छ । साथै, ऐनको दफा ३८(४) अनुसार सो उत्पादनको बिक्री वितरण नगर्न तथा नगराउन पनि निर्देशन दिइएको विभागले जनाएको छ ।
विभागले सार्वजनिक गरेको विवरणअनुसार ७५ ग्रामको ‘ज्याक न्याक क्र्याकर्स’ बिस्कुटको ब्याच नम्बर ६ रहेको छ । उक्त उत्पादनको उत्पादन मिति २०२५ डिसेम्बर ११ उल्लेख गरिएको छ भने उपभोग्य अवधि ९ महिना रहेको जनाइएको छ ।
उक्त बिस्कुट एसियन बिस्कुट एण्ड कन्फेक्सनरी प्रा. लि. ले उत्पादन गरेको हो । विभागले उपभोक्तालाई उक्त ब्याचको उत्पादन प्रयोग नगर्न आग्रह गरेको छ ।
