दोलखा । सडक निर्माणमा ठेकेदारले ढिलाइ गरेको भन्दै दोलखाको चरिकोटमा स्थानीय वासिन्दाले मानव साङ्लो बनाएर विरोध गरेका छन्। गत असारमै कालोपत्रे गरिसक्नुपर्ने सडक अहिलेसम्म निर्माणमा ढिलाई गरेको भन्दै विरोध जनाएका हुन् ।
सिन्धुपाल्चोक खाडीचौर– मुडे २५ किमी र मुडे–चरिकोट ३० किमी बेग्लाबेग्लै ठेक्का निकालेर सडक निर्माणको जिम्मेवारी दिए पनि सडक निर्माण अलपत्र परेपछि गत शनिबार सडक अलपत्र पार्ने ठेकेदार दीपक सापकोटाको फोटो बस, चोक र पोलमा टाँसेर विरोध गरेका उनीहरूले मंगलबार भने मानव साङ्लो बनाएका हुन्।
मंगलबार बिहान चरिकोटस्थित सातदोबाटोमा सडक निर्माण काम सुरू गर्न माग गर्दै मानव साङ्लो बनाइएको हो। उनीहरूले शंकरमाली निर्माण सेवाका प्रमुख सापकोटाविरूद्ध कारबाही गर्न पनि माग गरेका थिए।
