काठमाडौं । राष्ट्रिय परीक्षा बोर्ड, परीक्षा नियन्त्रण कार्यालय कक्षा–१०, सानोठिमी भक्तपुरले माध्यमिक शिक्षा परीक्षा (एसईई) २०८२ को नियमित तथा ग्रेडवृद्धि परीक्षाको नतिजा एसएमएस, आईभीआर तथा विभिन्न वेबसाइटमार्फत प्रकाशित गर्ने जनाएको छ।
कार्यालयले आइतबार सूचना जारी गर्दै नतिजा प्रकाशनका लागि विभिन्न सेवा प्रदायक संस्था तथा वेबसाइटलाई स्वीकृति दिइएको जानकारी गराएको हो। बोर्डका अनुसार विद्यार्थीहरूले मोबाइलमा एसएमएस, आईभीआर सेवा तथा अनलाइन वेबसाइटमार्फत नतिजा हेर्न सक्नेछन्।
सूचनाअनुसार नेपाल टेलिकमले एसएमएस, यूएसएसडी तथा आईभीआर सेवा सञ्चालन गर्नेछ। यसका लागि १६०० सर्टकोड प्रयोग गर्न सकिनेछ। त्यसैगरी जानकी टेक्नोलोजी प्रालिले ३५००१ र एम्बिसन गुरु प्रालिले ३१०६१ सर्टकोडमार्फत एसएमएस सेवा उपलब्ध गराउनेछन्।
नतिजा हेर्नका लागि राष्ट्रिय परीक्षा बोर्ड तथा अन्य विभिन्न संस्थाका वेबसाइट पनि प्रयोग गर्न सकिने जनाइएको छ। बोर्डले www.see.gov.np, www.neb.gov.np तथा नेपाल टेलिकमको www.see.ntc.net.np बाट नतिजा हेर्न सकिने जनाएको छ।
यसैगरी कान्तिपुर पब्लिकेसन्सको www.ekantipur.com, इडु सञ्जालको www.see.edusanjal.com, खल्ती एप, कलेज इन्फो नेपालको see.collegeinfonepal.com, द कनेक्ट प्लसको theconnectplus.com, एनसेल एपको ncellapp.ncell.com.np/result लगायतका प्लेटफर्मबाट पनि नतिजा प्राप्त गर्न सकिनेछ।
त्यस्तै निमा एजुकेशन फाउन्डेशनको result.neemaacademy.com, फोनिक्स एजुकेशन फाउन्डेशनको resultayo.com, एम्बिसन गुरुको see.ambition.guru, मेरो स्टडीको see.merostudy.net तथा इन्द्रेणी टाइम्स नेटवर्कको nebeducation.com/see बाट समेत एसईई २०८२ को नतिजा हेर्न सकिने बोर्डले जनाएको छ।
परीक्षा नियन्त्रण कार्यालयले विद्यार्थी तथा अभिभावकलाई आधिकारिक माध्यमबाट मात्रै नतिजा हेर्न आग्रह गरेको छ।
