ढाका । पछिल्लो समुद्री त्रासदीका रुपमा दक्षिणी बङ्गलादेशमा शुक्रबार एउटा खचाखच भरिएको फेरीमा आगलागी हुँदा कम्तीमा ३२ जनाको मृत्यु भएको प्रहरीले जनाएको छ । राजधानी ढाकाबाट २५० किलोमिटर दक्षिणमा पर्ने ग्रामीण सहर झलोकाठी नजिकै बिहान दुर्घटना भएको हो । सो फेरीमा करिब ५०० यात्रु सवार थिए ।
“तीन तले अभिजन–१० मा नदीको बीचमा आगलागी भएको छ, हामीले ३२ जनाको शव निकालेका छौँ, मृतकको सङ्ख्या बढ्न सक्छ, अधिकांशको आगोले र केहीको खोलामा हाम फालेर मृत्यु भयो”, स्थानीय प्रहरी प्रमुख मोइनुल इस्लामले भने ।
इञ्जिन कोठाबाट आगलागी भएको र ढाकाबाट घर फर्केका मानिसहरूले खचाखच भरिएको फेरीमा आगो लागेको इस्लामले बताए। “आगोले घाइते भएका करिब १०० जनालाई बारिसालका अस्पतालमा पठाएका छौँ”, उनले भने ।
यो दुर्घटना नदीहरुले घेरिएको डेल्टा मुलुकमा यस्तो प्रकारको घटनाहरुको शृङ्खलामा नवीन थियो । १७ करोड जनसङ्ख्या भएको यस देशका विज्ञहरुले कमजोर ममर्त सम्भार, सिपयार्डहरुमा सुस्त सुरक्षा मापदण्ड र भीडभाडलाई दोष दिएका छन् ।
आगलागी पनि त्रासदीको नियमित स्रोत हो। जुलाईमा ढाकाबाहिरको औद्योगिक सहर रुपगञ्जमा रहेको खाद्यान्न तथा पेय पदार्थ कारखानामा आगलागी हुँदा ५२ जनाको मृत्यु भएको थियो ।
सन् २०१९ फेब्रुअरीमा ढाका अपार्टमेन्टहरूमा आगलागी हुँदा कम्तीमा ७० जनाको मृत्यु भएको थियो । ती अपार्टमेन्टमा रसायनहरू अवैधरूपमा भण्डार गरिएको थियो।
गत अगस्टमा पूर्वी बङ्गलादेशको एउटा तालमा यात्रुहरूले भरिएको डुङ्गा र बालुवाले भरिएको कार्गो जहाज ठोक्किँदा कम्तीमा २१ जनाको मृत्यु भएको थियो। कार्गो जहाजको स्टिलको टुप्पो र डुङ्गा ठोक्किएपछि यात्रुवाहक जहाज पल्टिएपछि गोताखोरहरूले धमिलो हिलो पानीमा थप शवहरू खोज्नुपरेको थियो।
अप्रिल र मे महिनामा दुई छुट्टाछुट्टै दुर्घटनामा ५४ जनाको मृत्यु भएको थियो । गत वर्ष जुनमा ढाकामा एउटा डुङ्गा पछाडिबाट अर्को डुङ्गासँग ठोक्किएपछि डुब्दा कम्तीमा ३२ जनाको मृत्यु भएको थियो।
सन् २०१५ फेबु्रअरीमा एउटा खचाखच भरिएको जहाज अर्को मालबाहक जहाजसँग ठोक्किँदा कम्तीमा ७८ जनाको ज्यान गएको थियो । (एजेन्सी)
