काठमाडाैँ । पूर्वसञ्चारमन्त्री तथा राष्ट्रिय स्वतन्त्र पार्टी (रास्वपा) का सांसद जगदीश खरेलले आफ्नो नाम जोडेर केही सञ्चारमाध्यम र सामाजिक सञ्जालमा भ्रामक समाचार फैलाइएको भन्दै त्यसप्रति आपत्ति जनाएका छन्।
खरेलले सामाजिक सञ्जालमार्फत सार्वजनिक गरेको सन्देशमा आफूविरुद्ध ‘मिडिया ट्रायल’ गरिएको र नियोजित रूपमा फेक न्युज फैलाइएको दाबी गरेका छन्। उनले आफ्ना बारेमा फैलाइएका समाचारमा कुनै सत्यता नरहेको स्पष्ट पार्दै त्यस्ता भ्रममा नपर्न सर्वसाधारणलाई आग्रह गरेका छन्।
हाल आफू एक कार्यक्रमको सिलसिलामा स्विट्जरल्याण्डमा रहेको उल्लेख गर्दै उनले कुनै पनि गलत काम नगरेको दाबी गरेका छन्। “मैले गल्ती गरेको छैन, त्यसैले कुनै डर पनि छैन,” उनले लेखेका छन्।
खरेलले सत्य तथ्यको खोजी गर्न चाहने जो–कोहीले प्रश्न गर्न र अनुसन्धान गर्न सक्ने भए पनि अन्ततः सत्य नै स्थापित हुने बताएका छन्। आफ्नो इमानदारी नै आफ्नो राजनीतिक यात्राको आधार भएको उल्लेख गर्दै उनले त्यसमा आँच पुर्याउने प्रयास सफल नहुने दाबी गरेका छन्।
उनले आफ्नो चरित्र र राजनीतिक भविष्यमाथि प्रहार गर्ने उद्देश्यले नियोजित, भ्रामक तथा कपोलकल्पित सामग्रीहरू फैलाइएको आरोपसमेत लगाएका छन्। साथै, यस्ता गतिविधिविरुद्ध कानुनी उपचारको बाटो अपनाउने चेतावनी पनि दिएका छन्।
हाल पछिल्ला दिनमा सामाजिक सञ्जाल र केही अनलाइन माध्यममा सार्वजनिक व्यक्तित्वहरूलाई लक्षित गरी गलत सूचना फैलिने क्रम बढ्दै गएको सन्दर्भमा खरेलको यो प्रतिक्रिया आएको हो।
