वेलिङ्टन। न्युजिल्यान्डको बेरोजगारी दर २०२६ को मार्च त्रैमासिकमा ५.३ प्रतिशतमा झरेको छ, जुन २०२५ को डिसेम्बर त्रैमासिकको ५.४ प्रतिशतभन्दा कम रहेको न्युजिल्यान्डको राष्ट्रिय तथ्याङ्क विभागले बुधबार जनाएको छ ।
विभागका अनुसार सो अवधिमा बेरोजगार व्यक्तिको संख्या एक लाख ६५ हजार बाट घटेर एक लाख ६३ हजार पुगेको छ । रोजगारी दर भने ६६.७ प्रतिशतमै स्थिर रहेको छ ।
श्रम बजारको पूर्ण उपयोग नभएको अवस्था जनाउने व्यापक सूचक पनि १२.९ प्रतिशतमै स्थिर रहेको छ । यस अवधिमा यस्तो अवस्थामा रहेका व्यक्तिको संख्या चार लाख ६ हजार रहेको छ । यसमा बेरोजगार, आंशिक रूपमा मात्र काम पाएका तथा काम गर्न चाहने तर हाल श्रम बजारमा नसमेटिएका व्यक्तिहरू समावेश छन् ।
वार्षिक ज्याला वृद्धि दर २ प्रतिशत रहेको छ, जुन उपभोक्ता मूल्य वृद्धिदर ३.१ प्रतिशतभन्दा कम हो । औसत साधारण प्रति घण्टा पारिश्रमिक ४४.१२ न्युजिल्यान्ड डलर पुगेको छ ।
१५ देखि २४ वर्ष उमेर समूहका, न रोजगारीमा, न शिक्षा वा तालिममा रहेका युवाको दर १३.३ प्रतिशतबाट बढेर १४.४ प्रतिशत पुगेको छ, जसले युवाहरूलाई श्रम बजारमा प्रवेश गर्न थप कठिनाइ भइरहेको देखाउँछ ।
२० देखि २४ वर्ष उमेरका युवतीहरूमा यस्तो अवस्थाको दर १.९ प्रतिशत बिन्दुले बढेर २०.३ प्रतिशत पुगेको तथ्याङ्क विभागकी श्रम बजार प्रवक्ता एबी जोनस्टनले बताउनुभयो ।
अर्थशास्त्रीहरूले मध्यपूर्वमा जारी द्वन्द्व र इन्धन मूल्य वृद्धिले व्यवसायिक विश्वास कमजोर बनाउन सक्ने र आगामी महिनाहरूमा कम्पनीहरूले नयाँ भर्ती रोक्न सक्ने चेतावनी दिएका छन् ।(रासस/सिन्ह्वा)
