काठमाडौं । राष्ट्रिय स्वतन्त्र पार्टी (रास्वपा) का संसदीय दलका सदस्यहरूले प्रधानमन्त्री राहत कोषमा थप करिब २७ लाख १५ हजार रुपैयाँ योगदान गर्ने भएका छन् ।
संसदीय दलका पदाधिकारीबीच भएको अनौपचारिक छलफलबाट प्रत्येक सदस्यले न्यूनतम १५ हजार रुपैयाँका दरले प्रधानमन्त्री राहत कोषमा योगदान गर्ने प्रस्ताव अघि बढाइएको मुख्य सचेतक कविन्द्र बुर्लाकोटीले जानकारी दिनुभयो ।
यसअघि नै रास्वपाले प्रधानमन्त्री राहत कोषमा पार्टीका तर्फबाट ५० लाख रुपैयाँ योगदान गर्ने निर्णय गरिसकेको छ । उक्त रकममा संसदीय दलका सदस्यहरूबाट पार्टीमा कट्टा हुँदै आएको मासिक लेवीसमेत समावेश गरिएको बुर्लाकोटीले बताउनुभयो ।
त्यसबाहेक संसदीय दलका सदस्यहरूले व्यक्तिगत रूपमा समेत प्रधानमन्त्री राहत कोषमा रकम जम्मा गर्ने स्वघोषणा गरेका छन् । सदस्यहरूबाट न्यूनतम १५ हजार रुपैयाँका दरले योगदान गर्दा करिब २७ लाख १५ हजार रुपैयाँ जम्मा हुने जनाइएको छ ।
मुख्य सचेतक बुर्लाकोटीले प्रस्तावअनुसार योगदान रकम जम्मा गर्ने प्रक्रिया अघि बढाउन लागिएको जानकारी दिनुभएको छ ।
