हङकङ। संयुक्त राज्य अमेरिका र इरान बीच बढ्दो तनावका बीच विश्व शेयर बजार मंगलबार मिश्रित देखिएको छ भने तेलको मूल्य प्रारम्भिक वृद्धि पछि पुनः घटेको छ ।
अमेरिकी बजारमा अघिल्लो दिनको गिरावटपछि विश्व बजारमा सावधानीपूर्ण कारोबार देखिएको हो । अमेरिकी फ्युचर्स करिब ०.२ प्रतिशतले बढेको छ ।
युरोपेली बजारतर्फ बेलायतको मुख्य सूचक ०.८ प्रतिशतले घटेर १० हजार २८०.८७ मा झरेको छ । फ्रान्सको प्रमुख सूचक ०.६ प्रतिशतले बढेर ८ हजार २६.८९ पुगेको छ भने जर्मनीको प्रमुख सूचक १ प्रतिशतले बढेर २४ हजार २३२.४५ मा पुगेको छ ।
एशियाली बजारमा भने जापान, दक्षिण कोरिया र चीनमा सार्वजनिक बिदाका कारण कारोबार न्यून रहेको थियो । हङकङको प्रमुख सूचक ०.८ प्रतिशतले घटेको छ भने ताइवानको बजार ०.२ प्रतिशतले बढेको छ ।
अष्ट्रेलियाको प्रमुख सूचक ०.२ प्रतिशतले घटेको छ । त्यहाँको केन्द्रीय बैंकले ब्याजदर ४.३५ प्रतिशत पुर्याएको छ । मध्यपूर्वको द्वन्द्वका कारण इन्धन र कच्चा पदार्थको मूल्य बढ्दै गएपछि मुद्रास्फीति नियन्त्रण गर्न यस्तो निर्णय गरिएको हो ।
यसैबीच, हर्मुज जलडमरू क्षेत्रमा तनाव बढ्दै जाँदा युद्धविरामको अवस्था कमजोर भएको छ । अमेरिकी सेनाले नागरिक जहाज लक्षित गरेको भन्दै इरानी डुङ्गाहरू डुबाएको जनाएको छ भने अमेरिकी झण्डा बोकेका दुई जहाज सुरक्षित रूपमा उक्त मार्ग पार गरेका छन् ।
तेल बजारमा प्रारम्भिक वृद्धि देखिए पनि तनाव केही कम हुने संकेतसँगै मूल्य पुनः घटेको विश्लेषकहरूले बताएका छन् । (रासस/एपी)
