बर्लिन। जर्मनीका विदेशमन्त्री जोहान वाडेफुलले आइतबार इरानका समकक्षी अब्बास अराघचीसँगको टेलिफोन वार्तामा ‘स्ट्रेट अफ हर्मुज’ पुनः खोल्न माग गर्नुभएको छ ।
फोनवार्तामा उहाँले इरानलाई आणविक हतियार कार्यक्रम त्याग्न पनि सुझाब दिनुभएको जर्मनीको विदेश मन्त्रालयले जानकारी गराएको छ।
“मैले उहाँसँग जर्मनी अमेरिका–इरानबिच वार्तामार्फत् युद्ध अन्त्यको समाधानको पक्षमा दृढ रहेको बताएको छु,” विदेशमन्त्री वाडेफुलले फोनमार्फत् भएको कुराकानीको बारेमा एक्समा गरेको एक पोस्टमा उल्लेख गर्नुभएको छ।
अमेरिकी विदेशमन्त्री मार्को रुबिओले माग गरेबमोजिम इरानले आणविक हतियार पूर्ण रूपमा परित्याग गर्नुपर्ने र ‘स्ट्रेट अफ हर्मुज’ खोल्ने अमेरिकी निकट सहयोगीको रुपमा हाम्रो एउटै लक्ष्य रहेको वाडेफुलले बताउनुभयो ।
हालैका दिनहरूमा वाडेफुल र अन्य जर्मन अधिकारीहरूले अमेरिकी राष्ट्रपति डोनाल्ड ट्रम्प र जर्मन चान्सलर फ्रेडरिक मर्जबीचको विवाद कम गर्ने प्रयास गरिरहेका छन्।
मर्जले अप्रिल २७ मा भन्नुभएको थियो, “इरानले वार्ताको टेबलमा वाशिङ्गटनलाई ‘अपमानित’ गरिरहेकाले वाशिङ्गटनबाट आक्रोशित प्रतिक्रियाहरूको श्रृङ्खला आएका छन्। यो अन्त्य हुनुपर्छ ।”
अमेरिकाले गत शुक्रबार जर्मनीमा रहेको अमेरिकी सैन्य अखडाबाट पाँच हजार सैनिक हटाउने घोषणा गरेको थियो र ट्रम्पले आगामी दिनमा युरोपेली सङ्घबाट आउने कार र ट्रकमा अमेरिकी करवृद्धिलाई १५ प्रतिशतबाट बढाएर २५ प्रतिशत पुर्याउने घोषणा गर्नुभएको थियो ।
ट्रम्पले गत ग्रीष्म ऋतुमा हस्ताक्षर गरिएको व्यापार सम्झौताको पालना गर्न सम्पूर्ण इयू असफल भएको आरोप लगाउनुभएको सम्झौता ईयूको विधायी प्रक्रियाबाट गुज्रिरहेको छ ।
नयाँ करले जर्मनीको ठूला कार उद्योगलाई प्रभावित पार्नेछ । अप्रिलको सुरुमा युद्धविराम लागू भएदेखि इरानमाथि अमेरिका–इजरायल युद्ध अन्त्य गर्ने प्रयासमा थोरै स्पष्ट प्रगति भएको छ र त्यहाँ नयाँ वृद्धिको बारेमा चिन्ता बढ्दै गएको छ।
अमेरिकी राष्ट्रपति डोनल्ड ट्रम्पले तेहरानले बुझाएको नयाँ योजनाको समीक्षा गर्ने बताउनुभएको छ । उहाँले थप्नुभयो, “मेरो विचारमा इरानले ‘अझै ठूलो मूल्य चुकाएको छैन’।”
इरानको रिभोलुसनरी गाड्र्सले आइतबार एक विज्ञप्ति जारी गर्दै अमेरिकाले इरानसँग ‘असम्भव कारबाही वा खराब सम्झौता’ मध्ये एउटा रोज्नुपर्ने बताएको छ।
जर्मनीका चान्सलर मर्ज इरान युद्धको आलोचक रहँदै आउनुभएको छ । मर्ज र अन्य युरोपेली नेताहरूले स्ट्रेट अफ हर्मुजको बन्दबाट हुने आर्थिक गिरावटको बारेमा विशेष चिन्ता व्यक्त गरेका छन्।
युद्ध सुरु हुनुअघि विश्वको तेलको आपूर्तिको लगभग पाँच भागको एक भाग महत्त्वपूर्ण जलमार्ग हर्मुज हुँदै आएको थियो। (रासस/एएफपी)
