काठमाडौं । नेकपा एमालेका उपाध्यक्ष विष्णु पौडेलले माओवादीको उग्र वामपन्थी राजनीति समाज रुपान्तरणमा सफल हुन नसकेको बताएका छन्।
उनले माओवादीको नाममा देशले लामो समयसम्म उग्र वामपन्थको प्रभाव र त्यसबाट उत्पन्न अस्थिरताको मार भोग्नुपरेको टिप्पणी गरेका छन्।
काठमाडौंमा आयोजित २७ औं यदु स्मृति दिवस तथा २४ औं यदु स्मृति पत्रकारिता पुरस्कार वितरण कार्यक्रममा बोल्दै उपाध्यक्ष पौडेलले माओवादी आन्दोलनले सुरुवाती चरणमा हिंसा र सशस्त्र गतिविधिको बाटो लिएको भन्दै त्यसले समाज र राज्य संरचनामा दीर्घकालीन असर पारेको दाबी गरे।
उनले २०५६ सालको आम निर्वाचनमा एमालेका तर्फबाट रुकुममा उम्मेदवार रहेका यदु गौतमलाई तत्कालीन माओवादी समूहले हत्या गरेको प्रसंग स्मरण गर्दै त्यस्तो घटनाले राजनीतिक संस्कृतिमा गहिरो चोट पुर्याएको उल्लेख गरे।
पौडेलका अनुसार माओवादीले जनयुद्धका नाममा सत्ता कब्जाको प्रयास गरेको भए पनि त्यो असफल भएको थियो। उनले पछि माओवादी आन्दोलन परिवर्तन हुँदै एमाले र नेपाली कांग्रेससँग सहकार्य गरेर जनआन्दोलनमा सहभागी भएको स्मरण गराए।
उनले २०६४ सालको संविधानसभा निर्वाचनमा माओवादीले ठूलो जनमत प्राप्त गरे पनि त्यसलाई प्रभावकारी रूपमा उपयोग गर्न नसकेको टिप्पणी गरे। उनका अनुसार सरकारमा पुगेपछि पनि राज्य संरचना र सुरक्षा निकायमाथि नियन्त्रण गर्ने प्रवृत्ति देखिएको थियो, जसले राजनीतिक अस्थिरता थपिएको हो।
उपाध्यक्ष पौडेलले माओवादी आन्दोलनको प्रारम्भिक उद्देश्य र पछिल्ला अभ्यासबीच ठूलो अन्तर देखिएको भन्दै त्यसकै कारण देशले लामो समय चुनौती भोग्नुपरेको धारणा राखे।
