काठमाडौं । सत्तारुढ दल राष्ट्रिय स्वतन्त्र पार्टी (रास्वपा)का सांसद पुकार बमले विद्युतीय सवारीसाधन (ईभी) दुर्घटनाको दर बढ्दै गएको भन्दै सरकारले ‘ईभी सेफ्टी एजुकेसन’ कार्यक्रम सञ्चालन गर्नुपर्ने माग गर्नुभएको छ ।
प्रतिनिधि सभाको बुधवारको बैठकमा बोल्दै सांसद बमले ईभी दुर्घटनालाई सवारीसाधनको कमजोरीमा मात्र सीमित नगरी समग्र सडक सुरक्षा प्रणालीसँग जोडेर अध्ययन गर्नुपर्ने बताउनुभयो ।
उहाँले सवारी चालकको लापरवाही, कम उमेर तथा अनुभवहीन चालक र सार्वजनिक सवारी चालक अनुमतिपत्र वितरण प्रक्रिया प्रभावकारी भए–नभएको विषयमा समीक्षा गरी आवश्यकताअनुसार पुनरावलोकन गर्न सरकारको ध्यानाकर्षण गराउनुभयो ।
‘पछिल्लो समय ईभी गाडीको दुर्घटना दर निकै बढेको देखिन्छ । तर हाम्रो प्रश्न ईभी मात्र होइन, समग्र रोड सेफ्टी सिस्टममाथि हो,’ उहाँले भन्नुभयो, ‘सवारी चालकमा चरम लापरवाही देखिन्छ । धेरै चालक कम उमेरका र अनुभवहीन छन् । सार्वजनिक सवारी चलाउन सवारी चालक अनुमति पत्र प्राप्त गर्ने प्रक्रिया कतिको वैज्ञानिक र प्रभावकारी छ भन्ने प्रश्न उठेको छ ।’
सांसद बमले दुर्घटनाको कारण अध्ययन गर्दा चालकको अनुभव, सीप र नियमन प्रणालीलाई समेत समेट्नुपर्ने बताउनुभयो । उहाँले दुर्घटनापछि सवारीसाधनलाई मात्रै दोष दिने कि चालकको अनुभव, सीप र नियमनलाई पनि हेर्ने भन्ने प्रश्न महत्वपूर्ण रहेको उल्लेख गर्नुभयो ।
ईभीको प्रविधि अन्य सवारीसाधनभन्दा फरक भएकाले यसको सुरक्षित प्रयोगबारे प्रयोगकर्तालाई पर्याप्त जानकारी दिन आवश्यक रहेको उहाँको भनाइ थियो । ईभीको ब्याट्रीको अवस्था कसरी पहिचान गर्ने, चार्जिङ गर्दा के–कस्ता सावधानी अपनाउने, दुर्घटना भएपछि के गर्ने तथा समस्याका प्रारम्भिक संकेत कसरी पहिचान गर्ने भन्ने विषयमा प्रयोगकर्तालाई शिक्षा दिनुपर्ने उहाँले बताउनुभयो ।
सांसद बमले यातायात व्यवस्था विभाग, नेपाल प्रहरी, सवारी उत्पादक तथा प्राविधिक विज्ञलाई सहभागी गराएर सरल नेपाली भाषामा ईभी सुरक्षा निर्देशिका तयार गर्नुपर्ने माग पनि गर्नुभयो । सरकारले त्यस्तो निर्देशिकासहित ‘ईभी सेफ्टी एजुकेसन’ कार्यक्रम सञ्चालन गर्नुपर्ने उहाँको भनाइ थियो ।
