काठमाडौं । सत्तारुढ दल राष्ट्रिय स्वतन्त्र पार्टी (रास्वपा)का सांसद यज्ञमणी न्यौपानेले लामो समयदेखि रिक्त रहेका राजदूत पदमा नियुक्ति गर्न सरकारको ध्यानाकर्षण गराउनुभएको छ ।
प्रतिनिधि सभाको बुधवारको बैठकमा बोल्दै सांसद न्यौपानेले राजदूतको पद रिक्त राखेर नेपालको कूटनीति बलियो हुन नसक्ने बताउनुभयो । योग्यता, क्षमता र विज्ञता भएका इच्छुक नेपाली नागरिक प्रशस्त रहे पनि राजदूत नियुक्ति प्रक्रिया अघि नबढेको भन्दै उहाँले सरकारसँग प्रश्न गर्नुभयो ।
उहाँले भन्नुभयो, “राजदूतको कुर्सी खाली राखेर कूटनीति बलियो हुँदैन । अहिलेसम्म राजदूत नियुक्ति किन नगरेको सरकार ? योग्यता, क्षमता र विज्ञता भएका इच्छुक नेपाली नागरिकहरू पनि प्रशस्तै छन् । अनि रोकियो चाहिँ कहाँ ? के ले रोक्यो, कसले रोक्यो सरकार ?”
प्रधानमन्त्री बालेन्द्र साह संयुक्त राष्ट्रसंघको महासभामा सहभागी हुन अमेरिका जान लागेको अवस्थामा अमेरिकामै नेपालको राजदूत नरहनु विडम्बनापूर्ण भएको उहाँले बताउनुभयो । रिक्त रहेका कूटनीतिक नियोगलाई लामो समय नेतृत्वविहीन नराखी तत्काल राजदूत नियुक्त गर्न उहाँले सरकारसँग माग गर्नुभयो ।
सांसद न्यौपानेले नेपालको परराष्ट्र नीतिलाई कर्मचारीको भरमा मात्र नछोड्न पनि सरकारको ध्यानाकर्षण गराउनुभयो । उहाँले सक्षम र योग्य व्यक्तिलाई जिम्मेवारी दिएर नेपालको कूटनीतिक उपस्थितिलाई प्रभावकारी बनाउनुपर्नेमा जोड दिनुभयो ।
