काठमाडौं । नेपाली कांग्रेसका सभापति गगन थापाले प्रधानमन्त्री बालेन्द्र साहले संसद र संसदीय समितिको संस्थागत भूमिका तथा मर्यादालाई पर्याप्त महत्व नदिएको आरोप लगाउनुभएको छ ।
सिंहदरबारमा भएको सर्वदलीय बैठकपछि सञ्चारकर्मीसँग कुरा गर्दै थापाले प्रधानमन्त्रीले संसदलाई बेवास्ता गर्ने अवस्था बन्न नहुने बताउनुभयो । प्रमुख प्रतिपक्षी दलका नेता संसदमा बोल्दा समेत प्रधानमन्त्रीको उपस्थिति नदेखिने गरेको उल्लेख गर्दै उहाँले सरकारको नेतृत्वबाट संसदको संस्थागत भूमिकालाई सम्मान गर्नुपर्नेमा जोड दिनुभयो ।
रसुवाको भोटेकोशी बाढीपछिको विपद् व्यवस्थापनका लागि उच्चस्तरीय संसदीय समिति गठन गर्ने सर्वदलीय निर्णय प्रधानमन्त्रीले स्वीकार नगरे समस्या उत्पन्न हुनसक्ने थापाको भनाइ छ । यस विषयमा उहाँले सत्तारुढ राष्ट्रिय स्वतन्त्र पार्टीका सभापति रवि लामिछानेलाई समेत ध्यानाकर्षण गराएको बताउनुभयो ।
थापाले संसदीय समितिलाई महत्वपूर्ण जिम्मेवारी दिएपछि त्यसको काम, अधिकार र मर्यादालाई सरकारले सम्मान गर्नुपर्ने बताउनुभयो । समितिले तयार पार्ने प्रतिवेदन सरकारले ग्रहण गरी त्यसका आधारमा आवश्यक काम अघि बढाउनुपर्ने उहाँको भनाइ थियो ।
उहाँले कांग्रेसले सरकारलाई सहयोग गरिरहेको उल्लेख गर्दै संसदीय समितिमा बसेर जिम्मेवारीपूर्वक काम गर्ने बताउनुभयो । तर, समितिले तयार गरेको प्रतिवेदनमाथि सरकारले छलफल र कार्यान्वयनमा रुचि नदेखाए त्यसले समस्या निम्त्याउन सक्ने उहाँले चेतावनी दिनुभयो ।
थापाले भन्नुभयो, “संसदप्रतिको प्रधानमन्त्रीजीको जुन खालको रवैया देखिन्छ, सकेसम्म संसदलाई पूर्ण रूपमा बेवास्ता गर्ने खालको छ । प्रमुख प्रतिपक्षी दलको नेताले संसदमा बोल्दा पनि उहाँको उपस्थिति देखिँदैन ।”
संसदीय समिति गठन गर्दा त्यसको कार्यक्षेत्र, जिम्मेवारी र आगामी कामबारे प्रधानमन्त्रीसँग सुरुदेखि नै संवाद गर्न रास्वपा सभापति लामिछानेलाई सुझाव दिएको पनि थापाले बताउनुभयो । यसो गर्दा समितिले तयार गर्ने प्रतिवेदन कार्यान्वयनका क्रममा सरकार र संसदबीच असमझदारी उत्पन्न नहुने उहाँको भनाइ छ ।
सर्वदलीय बैठकमा एक साताभित्र संसदीय समिति गठनका लागि सभामुखलाई औपचारिक रूपमा आग्रह गर्ने विषयमा समझदारी भएको थापाले जानकारी दिनुभयो । संसदीय समिति गठन र विपद् व्यवस्थापनका विषयमा दलहरूबीच सहकार्य जारी रहने उहाँले बताउनुभयो ।
