काठमाडौँ। इस्तानबुलको एक प्रहरी चेकप्वाइन्टमा भएको सशस्त्र आक्रमणपछि इस्लामिक स्टेट (आईएस) विरुद्ध देशभर चलाइएको अपरेसनमा टर्कीका अधिकारीहरूले १९८ संदिग्धहरूलाई जेल पठाएका छन् ।
न्यायमन्त्री अकिन गुर्लेकले यसबारे जानकारी दिनुभएको हो । देशका ३४ वटा प्रान्तहरूमा गरिएको समन्वयात्मक छापामा कुल २७३ व्यक्तिहरूविरुद्ध कानूनी कारबाही शुरु गरिएको थियो ।
जसमध्ये १९८ जनालाई अदालतले औपचारिक रूपमा पुर्पक्षका लागि हिरासतमा पठाउने आदेश दिएको छ । मंगलवार इस्तानबुलस्थित इजरायली वाणिज्य दूतावास नजिकै तीन आक्रमणकारीले प्रहरी सुरक्षा बिन्दुमा गोली चलाएपछि यो व्यापक धरपकड शुरु गरिएको हो ।
उक्त भिडन्तमा एक आक्रमणकारी मारिएका थिए भने दुई प्रहरी अधिकारी र दुई आक्रमणकारीसहित अन्य चार जना घाइते भएका थिए । न्यायमन्त्री गुर्लेकका अनुसार यी अपरेसनहरू देश भित्र र सीमा क्षेत्रमा रहेका सुरक्षा खतराहरूलाई निस्तेज पार्ने बृहत्तर प्रयासको हिस्सा हुन् ।
टर्कीले हालका वर्षहरूमा आफ्नो आन्तरिक सुरक्षा व्यवस्थालाई निकै कडा बनाएको छ र आईएस नेटवर्कका साथै अन्य प्रतिबन्धित समूहहरूमाथि नियमित रूपमा छापा मार्दै आएको छ ।
टर्की सरकारले सन् २०१३ मा आईएसलाई आतंकवादी संगठनको रूपमा घोषणा गरेको थियो। त्यसयता टर्कीले यस समूहबाट भएका थुप्रै घातक आक्रमणहरू सामना गरिसकेको छ । सिन्ह्वा/न्युज एजेन्सी नेपाल
