काठमाडौं । प्रधानमन्त्री वालेन्द्र शाहले नेपालको कूटनीतिक इतिहासमा नै एउटा नयाँ प्रयोग गर्ने भएका छन् । उनले नेपालमा रहेका विदेशी कूटनीतिक नियोग प्रमुख एवं राजदूतहरुलाई सामूहिक रुपमा भेट्ने भएका हुन् ।
समाचार स्रोतका अनुसार प्रधानमन्त्री शाहले भोलि नेपालमा रहेका विदेशी राजदूतहरुलाई यसरी भेट्ने भएका हुन् । उनी प्रधानमन्त्री नियुक्ति भएको १० दिन बितिसक्दासम्म पनि कुनै पनि विदेशी राजदूतसँग भेट गरेका छैनन् । उनले बुधबार बिहान परराष्ट्रमन्त्री शिशिर खनाललाई राखेरै विदेशी राजदूतसँग सामूहिक भेटवार्ता गर्ने भएका बताइएको हो ।
स्रोतका अनुसार भोलि बिहान करीब ११ बजेतिर विदेशी राजदूतहरुलाई सामूहिक भेटवार्ताका लागि प्रधानमन्त्रीको कार्यालयले खबर गरेको बताइएको छ । सो भेटका लागि भारत, चीन, अमेरिका, बेलायत लगायतका देशका राजदूतहरुलाई पनि खबर गरिएको समाचार स्रोतले बतायो ।
प्रधानमन्त्री नियुक्त भएलगत्तै प्रधानमन्त्री भेट्नका लागि राजदूतहरूको भीड लाग्ने गर्दथ्यो । बालुवाटारमा हुने यो भिडभाडलाई कूटनीतिक मर्यादाविपरीत भनेर टिप्पणी गर्ने गरिएको थियो । त्यतिबेलाको सो भेटघाट एक्लाएक्लै हुने गर्दथ्यो भने अहिले सामूहिक रूपमा हुनेछ । त्यसैले यसलाई कूटनीतिमा नयाँ प्रयोग भनिएको छ ।
