काठमाडौैं । नेपाली राजदूतावास बैंकक को पहल तथा कम्बोडिया सरकार को सहयोगमा कम्बोडियामा अलपत्र परेका ७ जना नेपाली नागरिकको उद्धार गरिएको छ।
विभिन्न व्यक्तिहरुको प्रलोभनमा परी कम्बोडिया पुगेका ती नेपालीहरुलाई अवैधरूपमा सञ्चालन भइरहेका अनलाइन स्क्यामिङ केन्द्र, क्यासिनो तथा अन्य गैरकानुनी गतिविधिमा संलग्न गराइएको थियो। बिना भिषा बसिरहेका उनीहरुलाई गैर आवासीय नेपाली संघ (NRNA) कम्बोडियाको सहजीकरणमा चैत्र २२ गते कम्बोडियाबाट उडाएर चैत्र २३ गते त्रिभुवन अन्तर्राष्ट्रिय विमानस्थल मार्फत नेपाल फर्काइएको छ।
राजदूतावासका अनुसार, कम्बोडियामा अझै पनि केही नेपाली नागरिक अनलाइन ठगी लगायतका गैरकानुनी काममा फसिरहेको तथा भिषा अवधि नाघेर बसिरहेको जानकारी प्राप्त भएको छ। यस्तो अवस्थामा रहेका नेपालीहरुलाई तत्काल सम्पर्कमा आई स्वदेश फर्किन आग्रह गरिएको छ।
राजदूतावासले स्क्यामिङ केन्द्रमा काम गराइएकाहरुको राहदानी कम्पनीले जफत गर्ने वा हराउने समस्या समेत देखिएको जनाएको छ। यस्तो अवस्थामा नेपाल फर्किनका लागि राजदूतावासले निःशुल्क एकतर्फी यात्रा अनुमति पत्र उपलब्ध गराउने व्यवस्था रहेको पनि जनाएको छ।
कम्बोडियाको पर्यटन तथ्याङ्क अनुसार नेपालीहरुको आवागमन पछिल्ला वर्षमा तीव्र रूपमा बढ्दै गएको छ। सन् २०२१ मा १०१ जना नेपाली कम्बोडिया पुगेका थिए भने २०२५ मा यो संख्या बढेर ९,६७६ पुगेको छ।
राजदूतावासले वैदेशिक रोजगारीमा जानुअघि अनिवार्य रूपमा श्रम स्वीकृति लिन र छिटो तथा धेरै आम्दानीको लोभमा कम्बोडिया, लाओस, म्यानमार, थाइल्याण्ड जस्ता मुलुकहरूमा भ्रमणको बहानामा नजान पुनः आग्रह गरेको छ। साथै, यसबारे जनचेतना फैलाउन आमसञ्चार माध्यम र नागरिक समाजलाई समेत सहयोग गर्न अनुरोध गरिएको छ।
