काठमाडौँ। नेपाल निर्माण व्यवसायी महासङ्घको नयाँ नेतृत्व चयनका लागि बिहीवार भएको मतदान कार्य उत्साहजनक रूपमा सम्पन्न भएको छ ।
महासङ्घको चैत १७ गतेदेखि शुरु भएको अधिवेशन अन्तर्गत बिहीवार दिउँसो ४ः१० बजे मतदान सकिएको हो। कुल ९ सय ६१ मतदाता रहेकोमा ९ सय ४२ मत खसेको निर्वाचन समितिले जनाएको छ । मतदान कार्य सम्पन्न भएसँगै अहिले मतपेटिका सङ्कलन गरी मतगणना शुरु गर्ने तयारी भइरहेको छ ।
यस पटकको निर्वाचनमा दुई प्यानलबीच मुख्य प्रतिष्पर्धा देखिएको छ । वर्तमान नेतृत्वको प्यानलबाट एडि लामाले अध्यक्षमा उम्मेदवारी दिनुभएको छ भने परिवर्तनको उद्घोषसहित निकोलस पाण्डे पनि अध्यक्षको प्रतिष्पर्धामा हुनुहुन्छ ।
त्यस्तै वरिष्ठ उपाध्यक्ष पदका लागि महासचिव रोशन दाहाल र एसोसिएट उपाध्यक्ष रामजी पन्त मुकेशबीच चुनावी प्रतिष्पर्धा भइरहेको छ ।
एसोसिएट उपाध्यक्ष पदमै एन सि शेर्पा र नरहरि थपलिया तथा महासचिव पदमा शिवहरि घिमिरे र बलिभद्र राना चुनावी मैदानमा हुनुहुन्छ ।
निर्वाचन प्रक्रिया अन्तर्गत लुम्बिनी र कर्णाली प्रदेशको उपाध्यक्ष पदमा भने बुधवार नै सर्वसम्मत नेतृत्व चयन भइसकेको छ । लुम्बिनी प्रदेश उपाध्यक्षमा शहदेव खड्का र कर्णाली प्रदेश उपाध्यक्षमा हिमबहादुर बुढा निर्विरोध निर्वाचित हुनुभएको हो ।
नवनिर्वाचित लुम्बिनी प्रदेश उपाध्यक्ष शहदेव खड्काले व्यवसायीहरूको हकहितका लागि आगामी कार्यसमितिले सशक्त भुमिका खेल्ने विश्वास व्यक्त गर्नुभयो ।
खड्काले निर्माण व्यवसायीहरूको हकहित, खरिद ऐनमा सुधार र रुग्ण आयोजनाहरूको व्यवस्थापनलाई आफ्नो मुख्य एजेण्डा बनाएको बताउनु भयो ।
उहाँले आफूलाई विश्वास गरेर सर्वसम्मत रूपमा निर्वाचित गराउने सम्पूर्ण मतदाता र प्रतिनिधिहरूलाई धन्यवाद ज्ञापन गर्दै व्यवसायीहरूको विश्वासमा आँच आउन नदिने प्रतिवद्धता व्यक्त गर्नुभयो ।
उपाध्यक्ष खड्काले वर्षौंदेखि अलपत्र परेका रुग्ण आयोजनाहरूको समाधानका लागि महासंघको तर्फबाट सरकारलाई ठोस प्रश्ताव (प्रपोजल) बुझाउने तयारी भइरहेको जानकारी दिनुभयो ।
उहाँले राज्य र व्यवसायी दुवैलाई फाइदा हुने गरी १०–१५ वर्ष पुराना आयोजनाहरूको निकास खोज्नुपर्नेमा जोड दिनुभयो । वर्तमान समयमा डिजेल, बिटुमिन, डन्डी र सिमेन्ट जस्ता निर्माण सामग्रीमा भएको चरम मूल्य वृद्धिले व्यवसायीहरू मारमा परेको उहाँले बताउनु भयो ।
देशभरका निर्माण व्यवसायीहरूको चासो रहेको यस निर्वाचनको अन्तिम नतिजा मतगणना सकिएलगत्तै सार्वजनिक गरिनेछ । –न्युज एजेन्सी नेपाल
