झापा। आदिवासी याक्थुङ/लिम्बूहरुको जातीय संस्था किरात याक्थुङ चुम्लुङको अध्यक्षमा गोविन्दबहादुर लिम्बू (आङ्बुहाङ) निर्वाचित हुुनुभएको छ ।
झापाको भद्रपुरमा आइतबार सम्पन्न तीनदिने १२औँ राष्ट्रिय महाधिवेशनबाट आङ्बुहाङको अध्यक्षतामा ३९ सदस्यीय नयाँ सङ्घीय कार्यसमिति निर्वाचित गरेको हो ।
सर्वसम्मत निर्वाचित सङ्घीय समितिको तीन उपाध्यक्षमा निरन्ती तुम्बापो, योगेन्द्र पालुङवा, चक्र येक्तेन (अभिषेक), महासचिवमा अमर तुम्याहाङ, उपमहासचिवमा भवानीविक्रम सम्बाहाम्फे, तीन सचिवमा लक्ष्मण लावती (मेची भूगोल), जीवनप्रकाश शेर्मा (कोशी भूगोल) र सङ्गीता सुब्बा (लिम्बूवान भूगोल)र कोषाध्यक्षमा कुमार जबेगु निर्वाचित हुनुभएको छ ।
ताप्लेजुङ, पाँचथर, इलाम, झापा, मोरङ, सुनसरी, धनकुटा, तेह्रथुम, सङ्खुवासभा, चितवन, ललितपुर, काठमाडौँ, भक्तपुर, ओखलढुङगा र कास्की जिल्ला प्रतिनिधिहरु सम्मिलित महाधिबेशनबाट सङ्घीय सदस्यहरुमा गङ्गा राई शेर्मा (झापा), धर्मराज लक्सम्बा (झापा), सरस्वती तुम्बाहाङफे (इलाम) रामकुमार योङहाङ (इलाम) लगायत चुनिनुभएको छ ।
चुम्लुङको नवनिर्वाचित सङ्घीय समितिले आज भद्रपुरमा पत्रकार सम्मेलन गरी नवनिर्वाचित समितिको घोषणा र महाधिवेशनले १८ बुँदे विभिन्न समसामयिक प्रस्तावहरु पारित गरेको नवनिर्वाचित महासचिव अमर तुम्याहाङले जानकारी दिनुभयो ।
उहाँका अनुसार महाधिवेशनले प्रदेश १ को नाम कोशी राखिएकोमा सो प्रति असहमति प्रकट गर्दै ‘लिम्बूवान, किरात’ प्रदेश हुन पर्ने माग दोह¥याएको छ । प्रदेशसभामा भएको लिम्बू र मैथिली सरकारी कामकाजको भाषा विधेयक अविलम्ब पारित गर्नुपर्ने महाधिवेशनले माग गरेको छ ।
याक्थुङ–लिम्बू आदिवासीहरूको थातथलो प्रथाजनित पुख्र्यौली आस्थाको पवित्र भूमि मुक्कुम्लुङमा केबलकार निर्माण गर्न राज्यले सशस्त्र सुरक्षा बल खटाइ मुन्धुमी आध्यात्मिक क्षेत्रको सैनिकीकरण गरी सन्त्रासपूर्ण वातावरण बनाएकाले राज्यले ती सुरक्षा फौज तुरुन्त हटाउन महाधिवेशनले माग गरेको छ । रासस
