झापा। नेपाल पत्रकार महासङ्घ झापा शाखाले आज १३ जना ज्येष्ठ पत्रकारलाई पेन्सनस्वरुप वार्षिक भत्ता वितरण गरेको छ ।
महासङ्घको ७१औँ स्थापना दिवसका अवसरमा काँकरभिट्टामा आयोजित ‘पत्रकारिताको शुद्धीकरण र सुदृढीकरण’ विषयक अन्तरक्रिया कार्यक्रममा १५ हजार रुपैयाँका दरले वार्षिक भत्ता वितरण गरेको हो ।
महासङ्घले स्थापना गरेको पत्रकार सहारा उपचार कोषको ब्याजबाट २०८० सालदेखि ६५–७५ वर्ष उमेरसम्मका ज्येष्ठ पत्रकारलाई वार्षिक वृत्तिस्वरुप १५ हजार रुपैयाँ र सोभन्दा माथिका ज्येष्ठ पत्रकारलाई वार्षिक २० हजार रुपैयाँका दरले भत्ता रकम प्रदान गरिँदै आएको महासङ्घका झापा अध्यक्ष एकराज गिरीले जानकारी दिनुभयो ।
वार्षिक भत्ता पाउने ज्येष्ठ पत्रकारमा गोविन्द चन्द क्षेत्री, केशव आचार्य, चिन्तामणि दाहाल, चन्द्र भण्डारी, गञ्जबहादुर दाहाल, लक्ष्मण ढकाल, शिरोमणि खतिवडा, विष्णुकुमार भट्टराई, चुडामणि वशिष्ठ, लेखनाथ परदेशी, लीला बराल, गोपाल गिरी र लक्ष्मी लुइँटेल हुनुहुन्छ ।
उहाँहरुलाई अध्यक्ष गिरी र महासङ्घका कोशी प्रदेश समितिका अध्यक्ष भरतबहादुर खड्काले रकम वितरण गर्नुभएको थियो । कार्यक्रममा अध्यक्ष खड्का, नेपाल पत्रकार महासङ्घका पूर्वकेन्द्रीय महासचिव चन्द्र भण्डारी, कोशी प्रदेश समितिकी उपाध्यक्ष अम्बिका भण्डारीले शुभकामना व्यक्त गर्नुभएको थियो ।
कार्यक्रममा पत्रकारिताको शुद्धीकरण र सदृढीकरणका लागि आचारसंहिताको पूर्णपालना र पत्रकारको क्षमता विकासलगायतका विषयमा जोड दिँदै ११ बुँदे ‘झापा सङ्कल्प पत्र–२०८२’ पारित गरिएको थियो । रासस
