काठमाडौं । अर्जुननरसिंह केसीले देशको राजनीतिक संस्कृतिको प्रतिनिधित्व संसदले गर्ने बताउनुभएको छ ।
बिहीवार सिंहदरबारमा नवनिर्वाचित प्रतिनिधि सभा सदस्यहरूको शपथग्रहणपछि सञ्चारकर्मीहरूसँग कुरा गर्दै उहाँले संसदलाई मर्यादित र अनुशासित बनाउन उच्च राजनीतिक संस्कृतिको आवश्यकता रहेको उल्लेख गर्नुभयो । संसदभित्र देखिने वैचारिक घर्षणलाई सन्तुलित गर्दै सभामुखले समन्वयकारी भूमिका निर्वाह गर्नुपर्ने उहाँको भनाइ थियो ।
उहाँले सभामुखको मुख्य दायित्व सांसदहरूको विशेषाधिकारको रक्षा गर्नु, संसदको गरिमा कायम राख्नु तथा वादविवाद, प्रतिवाद र संवादलाई निष्पक्ष रूपमा संयोजन गर्नु रहेको स्पष्ट पार्नुभयो । सभामुख संसदको प्रवक्ता तथा संसदीय अधिकारको प्रमुख रक्षक भएको उल्लेख गर्दै पारदर्शिता, अनुशासन र मर्यादा कायम राख्नुपर्नेमा उहाँले जोड दिनुभयो ।
संविधान, प्रतिनिधिसभा नियमावली तथा राष्ट्रिय–अन्तर्राष्ट्रिय संसदीय मान्यताका आधारमा निर्णय लिनुपर्ने उल्लेख गर्दै केसीले सभामुख कुनै एक पक्षको नभई सम्पूर्ण प्रतिनिधि सभाको साझा पद भएको बताउनुभयो । सबै पक्षलाई समेटेर एकता कायम गर्न सक्ने व्यक्तित्व सभामुख हुनुपर्नेमा उहाँले विशेष जोड दिनुभयो ।
ज्येष्ठ सदस्य केसीले बिहीवार नवनिर्वाचित सांसदहरूलाई शपथ ग्रहण गराउनुभएको थियो । प्रतिनिधि सभामा सभामुख चयन नभएसम्म सभाको बैठक सञ्चालनको जिम्मेवारी उहाँकै रहनेछ ।
