काठमाडौं । केपी शर्मा ओलीले कार्की आयोगको प्रतिवेदनप्रति कडा आपत्ति जनाउँदै त्यसलाई ‘कुकर्म’ र ‘भद्दा नाटक’को संज्ञा दिएका छन् ।
नेकपा (एमाले) का अध्यक्षसमेत रहेका ओलीले फौजदारी अपराध संहिता, २०७४ को दफा १८१ र १८२ अन्तर्गत आफूमाथि छानबिन गर्न गरिएको सिफारिस कानुनी रूपमा निराधार र अस्वीकार्य रहेको बताए । उनका अनुसार ती दफा आकर्षित हुन सम्बन्धित व्यक्ति घटनास्थलमा उपस्थित हुनुपर्ने र घटना प्रत्यक्ष रूपमा सोही व्यक्तिबाट गराइएको हुनुपर्ने कानुनी व्यवस्था छ ।
उहाँले प्रधानमन्त्रीले न त गोली चलाउने आदेश दिने न त स्वयं गोली चलाउने भन्दै आयोगको निष्कर्षप्रति प्रश्न उठाए । आयोगका पदाधिकारीहरूले पहिलेदेखि नै एमालेप्रति पूर्वाग्रही धारणा राखेकै कारण यस्तो प्रतिवेदन आएको उनको आरोप छ ।
ओलीले घटनास्थलमा उपस्थित नै नभएको व्यक्तिलाई लापरवाहीको आधारमा दोषी ठहर गर्न नसकिने जिकिर गर्दै यस्तो सिफारिस न्यायिक दृष्टिले असंगत भएको बताए। प्रधानमन्त्री, गृहमन्त्री वा प्रहरी महानिरीक्षकजस्ता पदाधिकारीविरुद्ध उक्त दफाअन्तर्गत सिफारिस गर्नु नमिल्ने उनको भनाइ छ ।
प्रतिवेदनमा आफ्नो नाम उल्लेख गरिनु चरम पूर्वाग्रहको परिणाम भएको दाबी गर्दै ओलीले त्यसलाई बदनाम गर्ने, चरित्र हत्या गर्ने तथा घृणाको राजनीति झल्काउने अर्को उदाहरणका रूपमा टिप्पणी गरे।
