काठमाडौँ। अमेरिकी सैन्य कमाण्ड (साउथकम) ले आईतवार पूर्वी प्रशान्त क्षेत्रमा लागूऔषध तस्करीमा संलग्न रहेको आशङ्का गरिएको एक डुङ्गामाथि नयाँ सैन्य आक्रमण गरेको छ ।
उक्त कारबाहीमा परी डुङ्गामा सवार दुई जनाको मृत्यु भएको साउथकमले पुष्टि गरेको छ । साउथकमले सामाजिक सञ्जाल एक्समार्फत जारी गरेको विज्ञप्तिअनुसार पूर्वी प्रशान्त क्षेत्रमा लागुऔषध ओसारपसारका लागि प्रयोग हुने नियमित मार्गमा सञ्चालित एक लो–प्रोफाइल’ डुङ्गालाई सैन्य आक्रमण गरी डुबाइएको हो ।
सैन्य कमाण्डले उक्त डुङ्गा लागुऔषध तस्करीमा सक्रिय रहेको पुष्टि गर्ने ‘भरपर्दो गुप्तचर सूचना’ प्राप्त भएको दाबी गरेको छ । यद्यपि, उक्त दाबीलाई पुष्टि गर्ने अन्य कुनै विस्तृत विवरण वा प्रमाण भने सार्वजनिक गरिएको छैन ।
अमेरिकी सञ्चारमाध्यमहरूकाअनुसार विगत दुई महिनाको अवधिमा लागुऔषध तस्करी विरुद्ध अमेरिकी सेनाले सार्वजनिक रूपमा घोषणा गरेको यो पहिलो आक्रमण हो ।
न्युयोर्क युनिभर्सिटी स्कुल अफ लसँग आबद्ध राष्ट्रिय सुरक्षा सम्बन्धी प्रकाशन ‘जस्ट सेक्युरिटी’ को तथ्याङ्कअनुसार, सन् २०२५ सेप्टेम्बरको शुरुदेखि क्यारिबियन र पूर्वी प्रशान्त क्षेत्रमा अमेरिकाले गरेको यो ६७ औँ आक्रमण हो। यी सैन्य कारबाहीहरूमा हालसम्म २२३ जनाको ज्यान गइसकेको छ, जसमा बेपत्ता भएका वा मृत मानिएका २३ जना समेत समावेश छन् ।
सन्दिग्ध लागुऔषध तस्करहरू विरुद्ध घातक सैन्य बल प्रयोग गरिएकोमा अमेरिकी सांसद र कानुनी विज्ञहरूले यसको कानूनी आधारमाथि प्रश्न उठाउँदै आएका छन् । त्यसै गरी, लक्षित डुङ्गा र व्यक्तिहरूको पहिचानका लागि प्रयोग गरिने प्रमाणहरूको विश्वसनीयताका बारेमा पनि आलोचना भइरहेको छ । सिन्ह्वा/ न्युज एजेन्सी नेपाल
