सप्तरी । प्रतिनिधि सभा निर्वाचनका क्रममा उम्मेदवारहरूले गरेको खर्च विवरण सार्वजनिक हुने क्रमसँगै रोचक तथ्यहरू बाहिर आउन थालेका छन् । फागुन २१ गते सम्पन्न निर्वाचनमा सप्तरी क्षेत्र नम्बर १ बाट प्रतिस्पर्धा गरेका उम्मेदवार शम्भुप्रसाद देवले आफ्नो खर्च विवरण सार्वजनिक गरेका छन् ।
राष्ट्रिय एकता दलका तर्फबाट उम्मेदवारी दिएका देवले निर्वाचन अवधिभर जम्मा १ लाख ५ सय रुपैयाँ खर्च भएको जानकारी निर्वाचन आयोगमा बुझाएका छन् । उनले सार्वजनिक गरेको विवरणअनुसार सबैभन्दा बढी खर्च सञ्चार माध्यममार्फत प्रचारप्रसारमा भएको देखिएको छ ।
देवले एक टेलिभिजन अन्तर्वार्ताका लागि मात्रै ५० हजार रुपैयाँ खर्च गरेको उल्लेख गरेका छन् । त्यस्तै, पम्पलेट छपाइमा १० हजार ५ सय रुपैयाँ खर्च गरिएको छ भने मोटरसाइकल र सिटी रिक्सा परिचालन गर्दा इन्धनमा ३० हजार रुपैयाँ खर्च भएको विवरणमा जनाइएको छ । उम्मेदवारी दर्तासम्बन्धी प्रक्रिया पूरा गर्न १० हजार रुपैयाँ खर्च भएको पनि उनले उल्लेख गरेका छन् ।
उम्मेदवार देवले सार्वजनिक गरेको खर्च विवरणले निर्वाचनमा प्रचारप्रसारका लागि सञ्चार माध्यमको प्रयोगमा उल्लेख्य रकम खर्च हुने गरेको देखाएको छ ।
