काठमाडाैँ ।नेकपा एमालेका महासचिव शंकर पोखरेलले जेनजी आन्दोलनको छानबिन गर्न गठित गौरीबहादुर कार्की आयोग निष्पक्ष छानबिनका लागि गठन नभएको बताएका छन् ।
महासचिव पोखरेलले सामाजिक सञ्जाल फेसबुकमार्फत आफ्नो धारणा सार्वजनिक गर्दै आयोगको प्रतिवेदनले नै यसको पुष्टि गरेको उल्लेख गरेका छन्। “कार्की आयोग निष्पक्ष छानबिनका लागि बनेको होइन भन्ने कुरा आयोगको प्रतिवेदनले स्पष्ट पारेको छ,” उनले लेखेका छन्।
उनका अनुसार कार्की आयोग र निर्वाचनमा प्रयोग गरिएको एल्गोरिदममार्फत नेपाली समाजमा परेको प्रभावलाई राजनीतिक तथा कानुनी वैधानिकता दिने प्रयास गरिएको थियो। सोही प्रयासअनुसार निर्वाचनको परिणाम र आयोगको प्रतिवेदन आएको उनको दाबी छ।
“निर्वाचन र आयोगको प्रतिवेदनसँगै नेपाली राजनीति नयाँ मोडतर्फ अग्रसर भएको छ,” उनले उल्लेख गरेका छन्। उनका अनुसार एल्गोरिदमको प्रयोगबाट लोकप्रियतावाद, अराजकतावाद र अवसरवादको मिश्रणमार्फत नयाँ शक्तिको उदय भएको छ।
आगामी राजनीतिक यात्रा सहज नहुने उल्लेख गर्दै उनले राष्ट्र र लोकतन्त्र दुवैले केही समय चुनौतीको सामना गर्नुपर्ने बताएका छन्।
यस्तो परिस्थितिमा ‘नयाँ शक्ति’ र ‘नेतृत्व’लाई उनीहरूको दृष्टिकोणअनुसार काम गर्ने अवसर दिनुका साथै जनतालाई प्रत्यक्ष अनुभवमार्फत मूल्याङ्कन गर्न दिनु नै विवेकपूर्ण कदम हुन सक्ने उनको भनाइ छ।
तर, उनले लोकप्रियतावाद, अराजकतावाद र अवसरवाद दीर्घकालीन समाधान वा विचारधारात्मक राजनीतिको विकल्प बन्न नसक्ने स्पष्ट पारेका छन्।
