काठमाडाैँ । बैतडीकाे पाटनस्थित भेटेरिनरी अस्पताल तथा पशु सेवा विज्ञ केन्द्र १७ महिनादेखि चिकित्सकविहीन हुँदा स्थानीय पशुपालक किसानहरू समस्यामा परेका छन्।
केन्द्रका प्रमुख गुमानीदत्त पन्तका अनुसार चिकित्सक अभावका कारण पशु उपचार सेवा प्रभावकारी रूपमा सञ्चालन हुन सकेको छैन। करारमा कार्यरत चिकित्सकले त्यागपत्र दिएपछि केन्द्र पूर्ण रूपमा चिकित्सकविहीन बनेको हो।
केन्द्रमा एक जना पशु चिकित्सकको दरबन्दी रहे पनि सुदूरपश्चिम प्रदेश सरकारले उक्त पद पूर्ति गर्न नसक्दा सेवा प्रवाहमा कठिनाइ भएको छ।
गम्भीर प्रकृतिका बिरामी पशुको उपचारका लागि धनगढीबाट चिकित्सक बोलाउनुपर्ने अवस्था रहेको केन्द्रप्रमुख पन्तले जानकारी दिनुभयो। यसले उपचारमा ढिलाइ हुनुका साथै किसानहरू थप समस्यामा पर्ने गरेका छन्।
ग्रामीण क्षेत्रमा पशुपालन प्रमुख आम्दानीको स्रोत रहँदै आएको अवस्थामा यस्तो समस्या समाधान गर्न सम्बन्धित निकायको ध्यानाकर्षण हुनुपर्ने स्थानीयहरूको माग छ।
