काठमाडौ । बझाङ जिल्लाको बित्थडखिर गाउँपालिकामा सडक निर्माण कार्यमा गम्भीर अनियमितता भएको आरोपमा अख्तियार दुरुपयोग अनुसन्धान आयोगले विशेष अदालत काठमाडौंमा आरोपपत्र दायर गरेको छ।
फागथला धारी–डोबा सडक निर्माण योजनाअन्तर्गत ठेक्का सम्झौताअनुसार काम सम्पन्न नभई पनि सम्पन्न भएको देखाएर भुक्तानी लिएको अनुसन्धानबाट खुलेको हो। तत्कालीन निमित्त प्रमुख प्रशासकीय अधिकृत चक्रदेव भट्ट, इन्जिनियर सन्देश भण्डारी, सब-इन्जिनियर किरण भण्डारी, लेखापाल रामचन्द्र धामी तथा निर्माण व्यवसायी भुमिराज कन्स्ट्रक्शनका प्रोप्राइटर मानबहादुर बोहरासहितको मिलेमतोमा झुट्टा बिल तथा प्रतिवेदन तयार पारिएको आरोप छ।
अनुसन्धानका क्रममा नापी किताबमा ३३८ मिटर सिँचाइ क्यानल उल्लेख भए पनि फिल्डमा २४८ मिटर मात्र निर्माण भएको भेटिएको छ। साथै, ह्युम पाइप कल्भर्ट तथा अन्य संरचना सम्बन्धी मेशनरी काम समेत स्थलमै नभएको पाइएको छ।
यसरी वास्तविक कामभन्दा कम निर्माण गरेर बढी भुक्तानी लिइएको तथा रु. ८ लाख ४८ हजार ९६२.२२ बराबरको सरकारी रकम हिनामिना गरिएको पुष्टि भएपछि भ्रष्टाचार निवारण ऐन, २०५९ अनुसार कारबाहीको माग गर्दै आरोपपत्र दायर गरिएको हो।
[pdf-embedder url=”https://newspolar.com/wp-content/uploads/2026/03/IpdRA8.pdf”]
