काठमाडौँ: काठमाडौंमा यामाहाले नेपालकै पहिलो हाइब्रिड मोटरसाइकल सार्वजनिक गर्दै मोटरसाइकल उद्योगमा नयाँ युगको सुरुवात गरेको छ। राजधानीको कमलादीस्थित स्काइ टावरमा आयोजित भव्य कार्यक्रममा कम्पनीले अत्याधुनिक हाइब्रिड प्रविधियुक्त नयाँ बाइक अनावरण गरेको हो।
कार्यक्रम दुई चरणमा सञ्चालन गरिएको थियो, जसमा इन्फ्लुएन्सर, कन्टेन्ट क्रिएटर, सञ्चारकर्मी, व्यवसायिक साझेदार तथा राइडिङ समुदायका सदस्यहरूको उल्लेखनीय सहभागिता रहेको थियो। कार्यक्रममा यामाहा परिवारका उच्च पदाधिकारीहरू सहित विभिन्न चर्चित व्यक्तित्वहरूको उपस्थिति थियो।
नयाँ मोटरसाइकल एफजेड सिरिजमा आधारित हाइब्रिड मोडेल हो, जसमा १४९ सीसी फ्युल-इन्जेक्टेड इन्जिन र स्मार्ट मोटर असिस्ट प्रविधिको संयोजन गरिएको छ। यसले उच्च एक्सेलेरेशन, सहज स्टार्ट–स्टप प्रणाली, कम इन्धन खपत र न्यून उत्सर्जन जस्ता विशेषता प्रदान गर्छ।
विशेषगरी सहरी यातायातलाई लक्षित गरी डिजाइन गरिएको यो बाइकले ६० किलोमिटर प्रतिलिटरभन्दा बढी माइलेज दिने दाबी गरिएको छ। बढ्दो इन्धन मूल्य र ट्राफिक समस्यालाई ध्यानमा राख्दै हाइब्रिड प्रविधिलाई दीर्घकालीन समाधानका रूपमा प्रस्तुत गरिएको छ।
यसका साथै बाइकमा सिंगल-च्यानल एबीएस, रियर डिस्क ब्रेक, रेडियल टायर, एलईडी लाइट, डिजिटल इन्स्ट्रुमेन्ट क्लस्टर र E20 फ्युल अड्याप्टिबिलिटी जस्ता आधुनिक सुविधाहरू समावेश छन्।
कार्यक्रममा कम्पनीले अनुप विक्रम शाहीलाई ब्रान्ड एम्बेसडर घोषणा गर्दै आफ्नो ब्रान्ड छविलाई अझ मजबुत बनाएको जनाएको छ।
यामाहाको देशव्यापी सेवा सञ्जालले ग्राहकलाई सहज सेवा उपलब्ध गराउने विश्वास व्यक्त गरिएको छ। कम्पनीका प्रतिनिधिहरूले यो कदम नेपालमा दिगो, स्मार्ट र आधुनिक यातायात प्रणालीतर्फको महत्वपूर्ण उपलब्धि भएको बताएका छन्।
यस सार्वजनिकसँगै यामाहाले नेपालमा हाइब्रिड मोटरसाइकलको नयाँ सेग्मेन्ट स्थापना गर्दै मोटरसाइकलिङको भविष्यतर्फ महत्वपूर्ण पाइला चालेको छ।
