काठमाडौँ। गुल्मेली अधिकृत समाजले गुल्मी जिल्लाबाट सङ्घीय संसद्मा नवनिर्वाचित सांसदलाई सम्मान गरेको छ ।
समाजद्वारा आज यहाँ आयोजित बधाई तथा शुभकामना कार्यक्रममा प्रतिनिधिसभा सदस्य निर्वाचन र राष्ट्रियसभा सदस्यमा निर्वाचित सांसदलाई सम्मान गरिएको हो ।
यसरी सम्मानित हुनेमा सांसद सागर ढकाल, गोविन्द पन्थी, चन्द्रबहादुर केसी, रामकुमारी झाँक्री, श्रद्धा कुँवर क्षेत्री र सुलभ खरेल रहनुभएको छ । त्यसैगरी प्रहरी महानिरीक्षक दानबहादुर कार्कीलाई पनि सम्मान गरिएको थियो ।
समाजकातर्फबाट गृहमन्त्री ओमप्रकाश अर्यालले टीका र माला लगाएर उहाँहरुलाई सम्मान गर्नुभयो । सो अवसरमा गृहमन्त्री ओमप्रकाश अर्यालले नवनिर्वाचित सांसदलाई बधाई तथा शुभकामना व्यक्त गर्दै सांसदले नागरिकसँग सहकार्य गरेर अगाडि बढ्ने विश्वास व्यक्त गर्नुभयो ।
गृहमन्त्री अर्यालले नवनिर्वाचितर पुराना सांसदबीचको बलियोसहकार्यका साथमा जनताका पक्षमा काम गर्नुपर्ने बताउनुभयो । उहाँले सामुहिक प्रयत्न र पहलसहितको नेतृत्व प्रणालीबाट देशलाई संकटबाट बचाएर पूर्वअवस्थामा ल्याएको उल्लेख गर्दै सङ्कट व्यवस्थापनको क्रममा जेजस्ता मानक स्थापित भएका छन् यसलाई अझै बढाउने गरी नवनिर्वाचित सांसदले भूमिका निर्वाह गर्नुपर्नेमा जोड दिनुभयो । उहाँले भन्नुभयो,“नवनिर्वाचित सांसदहरु सिर्जनशील हुनुहुन्छ । सामुहिकता र सहकार्यबाट मुलुकको विकास र समृद्धिको यात्रामा अगाडि बढ्नुपर्छ ।”
सम्मानीत सांसदले विधि र प्रक्रियाअनुरुप सहमति र सहकार्यको माध्यमबाट जनताको परिवर्तनको आकांक्षा पूरा गर्न सक्रियताका साथ लागि पर्ने विश्वास व्यक्त गर्नुभयो ।
कार्यक्रममा पूर्वमूख्यसचिव डा लीलामणि पौडेलले सुशासन प्रवर्द्धनका लागि सार्वजनिक सेवालाई चुस्त र प्रभावकारी बनाइनुपर्नेमा जोड दिनुभयो । समाजका अध्यक्ष एवं पूर्वसचिव डा रामप्रसाद घिमिरेले प्राकृतिक विपत्तिमा राहत जुटाउनेदेखि सार्वजनिक सेवामा प्रोत्साहनलगायतका काम गर्दै आएको उल्लेख गर्नुभयो । रासस
