खोटाङ। दिक्तेल रुपाकोट मझुवागढी नगरपालिकाले आयोजना गरेको बृहत् निःशुल्क स्वास्थ्य शिविरमा एक हजार ६१९ जनाले सेवा दिएका छन् ।
ओम हस्पिटल एन्ड रिसर्च सेन्टर प्रालि काठमाडौँ र गरिमा विकास बैङ्कसँगको सहकार्यमा नगरपालिकाले आयोजना गरेको दुईदिने स्वास्थ्य शिविरमा जिल्लाका विभिन्न स्थानीय तहका नागरिकले निःशुल्क स्वास्थ्य सेवा लिएका हुन् ।
विभिन्न रोगबाट ग्रसित स्थानीय नागरिकलाई आफ्नै गाउँठाउँमा विशेषज्ञ चिकित्सकबाट गुणस्तरीय स्वास्थ्य सेवा उपलब्ध गराउन दुईदिने निःशुल्क बृहत् स्वास्थ्य शिविर आयोजना गरिएको नगरप्रमुख तीर्थराज भट्टराईले जानकारी दिनुभएको छ । उहाँले भन्नुभयो, “दिक्तेलस्थित जिल्ला आयुर्वेद अस्पतालमा आयोजना गरिएको जिल्लाभरिका नागरिकले सेवा लिएका छन् । विभिन्न संस्थासँगको सहकार्यमा आयोजना गरिएको दुईदिने बृहत् स्वास्थ्य शिविर उपलब्धिमूलक बनेको छ ।”
निःशुल्क बृहत् स्वास्थ्य सेवा शिविरमा जनरल सर्जरी, स्त्री रोग, महिलाको पाठेघरमा हुने क्यान्सर, हाडजोर्नी, दन्त चिकित्सा, मनोरोग र चर्मरोगसम्बन्धी विशेषज्ञ सेवा उपलब्ध गराइएको ओम हस्पिटल एन्ड रिसर्च सेन्टर प्रालिका अध्यक्ष टङ्कबहादुर श्रेष्ठले जानकारी दिनुभएको छ ।
यही चैत ५ र ६ गते आयोजना गरिएको शिविरका लागि रिसर्च सेन्टर काठमाडौँका प्रमुख चिकित्सक डा आनन्दप्रसाद श्रेष्ठसहित ३३ जनाको विशेषज्ञ टोली दिक्तेल आएको नगरपालिकाले जनाएको छ । रासस
