झापा । भियतनाममा प्राप्त अन्तर्राष्ट्रिय सम्मानपछि गृह जिल्ला झापा पुगेका कलाकार तथा अभियन्ता माधव कल्पितलाई भव्य स्वागत गरिएको छ। राजधानी काठमाडौंबाट झापा पुगेका कल्पितलाई भद्रपुर विमानस्थलमा विभिन्न संघ–संस्थाका प्रतिनिधि तथा समर्थकहरूले उत्साहपूर्ण रूपमा स्वागत गरेका हुन्।
नाट्य प्रतिष्ठान, नागरिक बचाउ महाअभियान नेपाल तथा नागरिक बचाउ दल नेपालका कार्यकर्ताहरूको उल्लेखनीय उपस्थितिमा गरिएको स्वागत कार्यक्रममा स्थानीय नागरिकहरूको पनि उल्लेख्य सहभागिता देखिएको थियो। बाजागाजा, माल्यार्पण र खादा ओढाएर गरिएको स्वागतले कार्यक्रमलाई अझ भव्य बनाएको थियो।
कल्पितको नेतृत्वमा झापामा स्थापना गरिएको ‘झापा नाटक घर’ तथा सांस्कृतिक संग्रहालयको प्रभावकारी सञ्चालन र सांस्कृतिक संरक्षणमा पुर्याएको योगदानको उच्च मूल्याङ्कन गर्दै भियतनाम सरकारले उनलाई अन्तर्राष्ट्रिय सम्मान प्रदान गरेको हो। उक्त सम्मान मार्च ८, २०२६ मा भियतनामको दानाङ शहरमा आयोजित विशेष समारोहका बीच प्रदान गरिएको थियो।
सम्मान प्राप्तिपछि स्वदेश फर्किएका कल्पितले आफूलाई प्राप्त सम्मान सम्पूर्ण नेपाली कला, संस्कृति र समाजसेवाप्रति समर्पित रहेको बताए। उनले आगामी दिनमा अझ सक्रिय रूपमा सांस्कृतिक विकास, कला प्रवर्द्धन र सामाजिक अभियानहरूलाई अगाडि बढाउने प्रतिबद्धता व्यक्त गरे।
स्थानीय तहदेखि अन्तर्राष्ट्रिय स्तरसम्म नेपालको कला र पहिचानलाई चिनाउन सफल भएको भन्दै सहभागीहरूले कल्पितको कार्यको प्रशंसा गरेका थिए। यो सम्मानले झापा मात्र नभई समग्र देशको गौरव बढाएको धारणा व्यक्त गरिएको छ।
