काठमाडौँ। प्रधानमन्त्री सुशीला कार्कीसँग आज प्रधानमन्त्री निवास बालुवाटारमा नेपाल उद्योग वाणिज्य महासंघका अध्यक्ष चन्द्र ढकालले भेट गर्नुभएको छ ।
भेटका क्रममा स्वतन्त्र, निष्पक्ष र विश्वसनीय ढङ्गले निर्वाचन सम्पन्न गरी चुनावी सरकारलाई जिम्मेवारी हस्तान्तरण गरेकोमा प्रधानमन्त्री कार्कीलाई निजी क्षेत्रका तर्फबाट बधाई तथा धन्यवाद व्यक्त गर्नुभयो ।
भेटमा प्रधानमन्त्री कार्कीले निर्वाचन सम्पन्न गर्ने क्रममा नेपाल उद्योग वाणिज्य महासंघले पुर्याएको रचनात्मक सहयोगको प्रशंसा गर्नुभएको थियो। उहाँले लोकतान्त्रिक प्रक्रिया सुदृढ बनाउन निजी क्षेत्रको सकारात्मक भूमिका महत्त्वपूर्ण रहेको उल्लेख गर्नुभयो।
उक्त भेटवार्तामा सरकार र निजी क्षेत्रबीचको सहकार्यलाई अझ प्रभावकारी बनाउँदै अर्थतन्त्रलाई गतिशील बनाउने, लगानीमैत्री वातावरण निर्माण गर्ने तथा समृद्ध नेपालको यात्रालाई तीव्र बनाउने विषयमा साझा प्रतिबद्धता व्यक्त गरिएको थियो।
भेटमा देशको आर्थिक विकास, निजी क्षेत्रको भूमिका तथा आगामी दिनमा सहकार्य बढाउने विषयमा समेत छलफल भएको जनाइएको छ।
