काठमाडौँ। सरकारले पश्चिम एशिया (खाडी क्षेत्र) मा बढ्दो तनावका बीच त्यहाँ रहेका नेपाली नागरिकहरूको सुरक्षालाई आफ्नो सबैभन्दा ठूलो र पहिलो प्राथमिकतामा राखेको बताएको छ ।
परराष्ट्र मन्त्रालयले नेपालीहरूको सुरक्षा, अवस्था र आवश्यक परेको खण्डमा उद्धारका लागि उच्चस्तरीय संयन्त्र परिचालन गरी कूटनीतिक पहललाई तिब्र बनाएको जनाएको हो ।
परराष्ट्र मन्त्रालयका प्रवक्ता लोकबहादुर पौडेल क्षेत्रीकाअनुसार नेपाली नागरिकको सुरक्षा र समन्वयका लागि परराष्ट्र सचिवको संयोजकत्वमा गठित ‘इमर्जेन्सी रेस्पोन्स टिम’ (आपत्कालीन प्रतिक्रिया टोली) ले सक्रिय रूपमा काम गरिरहेको छ ।
उक्त टिमको तेस्रो बैठक सम्पन्न भइसकेको र बैठकमा नेपाली नागरिकको ज्यानधनको सुरक्षा, उद्धार र स्वदेश फर्कन चाहनेहरूलाई कसरी समन्वयात्मक रूपमा सहयोग गर्ने भन्ने विषयमा गम्भीर छलफल भएको छ ।
यसका साथै, उच्च राजनीतिक तहबाटै मध्यपूर्वका देशहरूसँग संवाद अगाडि बढाइएको छ । प्रधानमन्त्री आफैँले विभिन्न देशका समकक्षीहरूसँग टेलिफोन संवाद गरिसक्नुभएको र परराष्ट्रमन्त्रीले पनि कुवेत र बहराइनका समकक्षीहरूसँग नेपालीको सुरक्षाका विषयमा कुराकानी गर्नुभएको बताउनु भयो ।
उहाँले भन्नुभयो, ‘यस्तो संवेदनशील अवस्थामा केन्द्रबाट मन्त्रालय र पश्चिम एशियामा रहेका हाम्रा १० वटै कुटनीतिक नियोगहरूले मित्र राष्ट्रहरूसँग सघन समन्वय गरिरहेका छन् । नेपालीहरूको सुरक्षाका लागि हामी अहोरात्र खटिएका छौँ ।’
मन्त्रालयले सम्बन्धित देशका सरकारले जारी गरेका सुरक्षा एड्भाइजरी (सुझाव) हरूलाई पूर्ण रूपमा पालना गर्न, अफवाहको पछाडि नलाग्न र सुरक्षित रहन सम्पूर्ण नेपालीहरूलाई अपिल समेत गरेको छ । —न्युज एजेन्सी नेपाल
