मनाङ । हिमाली जिल्ला मनाङ जिल्ला को चामे गाउँपालिका–१ स्थित तिमाङ वन यतिबेला वसन्तको रङले भरिएको छ। वनभरि लालीगुराँस ढकमक्क फुलेका छन् भने ती फूलबीच हिमाली भेगका चौँरीहरू शान्त रूपमा चरिरहेका दृश्यले प्रकृतिको अनुपम सौन्दर्य झल्काइरहेको छ।
हिउँद सकिएसँगै सुरु हुने वसन्त ऋतुमा तिमाङ वरपरका वन राताम्य हुने गर्छन्। नेपालका राष्ट्रिय फूल लालीगुराँसले डाँडाकाँडा ढाक्दा यहाँको वातावरण अझै रमणीय बनेको छ। राता फूलले सजिएको वनबीच चौँरीहरू चर्दै गरेको दृश्य स्थानीयका लागि मात्र होइन, घुम्न आउने पर्यटकका लागि पनि आकर्षणको केन्द्र बनेको छ।
हिमाली जीवनसँग गहिरो सम्बन्ध राख्ने चौँरी यहाँका बासिन्दाको जीवनयापनको महत्वपूर्ण आधार हो। चौँरीबाट प्राप्त हुने दूध, घ्यू, छुर्पी र ऊनले स्थानीय अर्थतन्त्रमा टेवा पुर्याउँदै आएको छ। त्यही चौँरीहरू वसन्तको मौसममा लालीगुराँसले भरिएका वनमा चरिरहेका देख्दा हिमाली संस्कृतिसँग प्रकृतिको सुन्दर मेल देखिन्छ।
लालीगुराँस फुलेका डाँडाहरू, सफा हिमाली हावा र चौँरी चरिरहेका दृश्यले मनाङको प्राकृतिक सौन्दर्यलाई अझ जीवन्त बनाइदिन्छ।
स्थानीयहरूका अनुसार वसन्तको यही समय तिमाङ क्षेत्र घुम्नका लागि सबैभन्दा उपयुक्त मानिन्छ। प्रकृतिको काखमा चौँरी चर्दै गरेको दृश्य र ढकमक्क फुलेको लालीगुराँसले मनाङको पहिचानलाई अझ उजागर गरिरहेको छ।
तस्बिर: नवीन लामिछाने
