काठमाडाैँ । फागुन २१ गते सम्पन्न प्रतिनिधिसभा सदस्य निर्वाचनमा देशका विभिन्न सात जिल्लामा गरी ४९३ जना उम्मेदवारको जमानत जफत भएको छ।
जिल्ला निर्वाचन कार्यालय काठमाडौँका निर्वाचन अधिकारी ठाकुरप्रसाद भट्टराईका अनुसार काठमाडौँका १० वटा निर्वाचन क्षेत्रबाट उम्मेदवारी दिएका २२६ जना उम्मेदवारले कुल सदर मतको १० प्रतिशत मत प्राप्त गर्न नसक्दा उनीहरूको जमानत जफत भएको हो।
काठमाडौँ क्षेत्र नम्बर १ मा एमालेका उम्मेदवार मोहनराज रेग्मीसहित २६ जना उम्मेदवारको जमानत जफत भएको छ। त्यसैगरी क्षेत्र नम्बर २ मा राममणि फुयाँलसहित २५ जना, क्षेत्र नम्बर ३ मा एमालेका उम्मेदवार रामेश्वर फुयाँलसहित १९ जना तथा क्षेत्र नम्बर ४ मा २५ जना उम्मेदवारको जमानत जफत भएको हो।
यसैगरी काठमाडौँ क्षेत्र नम्बर ५ मा एमालेका उम्मेदवार ईश्वर पोखरेलसहित २२ जनाको जमानत जफत भएको छ भने क्षेत्र नम्बर ६ मा १७ जना, क्षेत्र नम्बर ७ मा २६ जना, क्षेत्र नम्बर ८ मा २१ जना, क्षेत्र नम्बर ९ मा २२ जना र क्षेत्र नम्बर १० मा २३ जना उम्मेदवारको जमानत जफत भएको निर्वाचन कार्यालयले जनाएको छ। प्रतिनिधिसभा सदस्यका उम्मेदवारहरूले धरौटीबापत १० हजार रुपैयाँ निर्वाचन कार्यालयमा बुझाएका थिए।
प्रतिनिधिसभा सदस्य निर्वाचन ऐन, २०७४ को दफा ७१ (१) अनुसार कुल सदर मतको १० प्रतिशत मत प्राप्त गर्न नसक्ने उम्मेदवारको धरौटी जफत हुने व्यवस्था रहेको छ।
यसैगरी कास्कीमा पनि धेरै उम्मेदवारको जमानत जफत भएको छ। जिल्ला निर्वाचन कार्यालयलाई उद्धृत गर्दै पोखराबाट प्राप्त जानकारीअनुसार कास्की–१ मा १४ जना, कास्की–२ मा १४ जना र कास्की–३ मा १२ जना उम्मेदवारको धरौटी जफत भएको छ।
दाङमा भने ५१ जना उम्मेदवारको जमानत जफत भएको प्रदेश निर्वाचन कार्यालयका सूचना अधिकारी गेहेन्द्र कवँरले जानकारी दिएका छन्। उनका अनुसार दाङ क्षेत्र नम्बर १ मा नेपाली कम्युनिष्ट पार्टीका उम्मेदवार मेटमणी चौधरी, एमालेका उम्मेदवार रेवतीरमण शर्मा तथा स्वतन्त्र उम्मेदवार कुलप्रसाद केसीसहित १२ जना उम्मेदवारको जमानत जफत भएको हो। त्यसैगरी क्षेत्र नम्बर २ मा २० जनाको जमानत जफत भएको छ।
इलाममा पनि १८ जना उम्मेदवारले जमानत जोगाउन सकेनन्। दुई निर्वाचन क्षेत्र रहेको इलाममा पहिलो हुने निर्वाचित हुने प्रणालीअन्तर्गत क्षेत्र नम्बर १ मा १३ उम्मेदवारमध्ये आठ जना र क्षेत्र नम्बर २ मा १४ उम्मेदवारमध्ये एक स्वतन्त्रसहित १० जनाको जमानत जफत भएको हो।
जमानत जफत हुनेहरूमा राष्ट्रिय प्रजातन्त्र पार्टीका ज्वाला नेपाल, नेपाल मजदुर किसान पार्टीका तुल्सीकेशरी प्रजापति, मङ्गोल नेसनल अर्गनाइजेसनका बुद्धलाल मेचे, नेपाल जनमुक्ति पार्टीका डम्बरसिंह लिम्बू, सङ्घीय लोकतान्त्रिक राष्ट्रिय मञ्चका रामप्रसाद लिम्बू, नेपाल कम्युनिष्ट पार्टी (माओवादी) का नारदमणि साङपाङ, उज्यालो नेपाल पार्टीका हरिबहादुर गुरुङ र जनता समाजवादी पार्टीका लिलाबहादुर सुनुवार रहेका छन्।
यसैबीच भोजपुरमा सात जना उम्मेदवारको जमानत जफत भएको छ। बागलुङ क्षेत्र नम्बर १ मा राष्ट्रिय जनमोर्चासहित आठ जना उम्मेदवारको जमानत जफत भएको सहायक निर्वाचन अधिकृत पूर्णप्रसाद शर्माले जानकारी दिए।
राष्ट्रिय जनमोर्चाका केन्द्रीय अध्यक्ष तथा पूर्वउपप्रधानमन्त्री चित्रबहादुर केसीले समेत जमानत जोगाउन नसकेको बताइएको छ।
रूपन्देहीमा १४३ जना उम्मेदवारको जमानत जफत भएको छ भने ललितपुरमा ६३ जना उम्मेदवारको धरौटी जफत भएको स्थानीय निर्वाचन कार्यालयले जनाएको छ। ललितपुरमा जमानत जफत हुनेमध्ये ४० जना राजनीतिक दलका र २३ जना स्वतन्त्र उम्मेदवार रहेका मुख्य निर्वाचन अधिकृत पुनाराम खनालले जानकारी दिएका छन्।
