काठमाडौं । अन्तर्राष्ट्रिय महिला दिवसको अवसरमा आयोजित एक कार्यक्रममा पूर्वमुख्यसचिव लिलादेवी गड्तौलले राज्यको माथिल्लो तहसम्मै महिलामाथि हुने विभेद अझै कायम रहेको बताएकी छन् ।
आइतबार काठमाडौं महानगरपालिकाद्वारा आयोजित कार्यक्रममा बोल्दै उहाँले मुलुकका विभिन्न क्षेत्रमा अझै पनि महिलामाथि अन्याय र असमान व्यवहार हुने गरेको बताएकी हुन्। समाज र राज्यका संरचनाहरूमा महिलाले निरन्तर चुनौती सामना गर्नुपरेको उनको भनाइ थियो।
उनले महिला अधिकारसम्बन्धी विषयमा काम गर्ने निकायले समेत पुरुषसँग सहकार्य र छलफल नगरी अघि बढ्न नसक्ने अवस्था रहेको भन्दै यसलाई दुःखद् स्थिति भएको बताइन् । महिला अधिकारको सवालमा संरचनागत रूपमा अझै धेरै सुधार गर्नुपर्ने आवश्यकता रहेको उनले उल्लेख गरिन्।
सार्वजनिक पदमा रहेका महिलाले गरेका सकारात्मक कामको श्रेय अन्य व्यक्तिले लिने तर कमजोरी वा अपजस भने महिलामाथि मात्रै थोपर्ने प्रवृत्ति समाजमा अझै देखिने गरेको पनि गड्तौलले बताइन् । उनका अनुसार महिलाले तल्लो तहमा मात्र होइन, राज्यको माथिल्लो पदमा पुग्दा पनि विभिन्न चुनौती सामना गर्नुपरेको छ।
कार्यक्रममा बोल्दै उनले महिलाले गरेका काममा समेत “अरूले सिकाएको” भन्दै श्रेय लिन खोज्ने प्रवृत्ति पुरुषको हकमा भने कम देखिने उल्लेख गरिन्। ड्तौलले महिला अधिकारको संरक्षण र प्रभावकारी कार्यान्वयनका लागि राज्य अझ गम्भीर हुन आवश्यक रहेकोमा जोड दिइन्।
